لای خۆیەوە، حەیان عەبدولغەنی وەزیری نەوتی عێراق ئاماژەی بەوەکردووە، رادەستکردنی نەوتی هەرێم بەپێی ڕێژەی بەرهەمهێنانی پێویست بۆ کۆمپانیای سۆمۆ دەبێت. وتیشی، داهاتی ئەو بڕە هەناردەکراوانە دەخرێتە سەر حسابێکی تایبەت و کرێی کۆمپانیاکانی لێبڕردرێت وەکو پێشەکی، بەڵام لەماوەی ٦٠ رۆژدا تیمێکی راوێژکاریی دادەمەزرێنرێت، بۆ دیاریکردنى تێچووى بەرهەمهێنانى نەوتەکە و بڕی نەوتی خاو کە لەلایەن کۆمپانیاکانەوە لە هەرێمدا بەرهەم دەهێنرێت دووبارە حیساب دەکرێتەوە و ئەو داهاتەی دەمێنێتەوە دەڕواتە بودجەی فیدراڵییەوە.

هاوکات، عەتوان عەتوانی سەرۆکی لیژنەی دارایی پەرلەمانیش باسى لەوە کردووە، پێویستە گرێبەستەکانی نەوت لە هەرێم، لەگەڵ دەستور بگونجێنرێت، بە رەچاوکردنی گرێبەستەکانی هەرێم وەک گرێبەستی هاوبەشکردنی بەرهەمهێنان و نەک گرێبەستی هاوبەشکردنی قازانج، ئەمەش ئاماژەیە بۆ ئەوەی کە خواستێک هەیە لەلایەن هەردوو لایەن کە دەتوانن ئەم گرێبەستانە هەموار بکەنەوە و بیانگونجێنن.

عەتوان عەتوانی ئاماژەی بەوەش کرد، تا ئەوکاتەی گرێبەستەکان بە شێوەیەکی یاسایی دەستکاری نەکرێن، دەبێت قۆناغێکی راگوزەر هەبێت کە هەمووان مامەڵەی لەگەڵدا بکەن بۆ دەستپێکردنەوەى هەناردەى نەوتى هەرێم.