نەوەی نوێ وەک سەنگ و قورسایی تەرازوی هاوکێشەکە

6752 جار خوێندراوەتەوە

یەک هەرێم، یەک حکومەت، یەک پەرلەمان و یەک هێزی پێشمەرگە، ئەو چوار پرەنسیپەن کە سەرۆکی پارتی دیموکراتی کوردستانی خاوەن زۆرینەی پەرلەمانی، بۆ حوکمداری کابینەی نوێ رایگەیاند.

هەر چواریان، چوار چاڵی شێرپەنجەیی موزمینی چارەکە سەدەیەک ژیان و تەمەنی حوکمڕانیی هەرێمی کوردستانە، بە ویست و بەرنامە و دەستومەچەکی (پارتی خۆی و هاوپەیمانەکانی) چێکراون و هەڵکەندراون، خەڵکوخوای کوردستانیش لە چاوەڕوانی چارەسەردا بوون، نەکرا و بێچارە ماونەتەوە.

پارتی و یەکێتی، هەمیشە رێککەوتن، پێکهاتن، ئاشتی و تەنانەت شەڕی نێوانیشیان بە ویست و داوا و نێوەندگیری بێگانە بووە! ئەو چوار خانە شێرپەنجەییەش هەر دەستکرد و دڵخوازی ئەوان بووە! جارێکی تر چەندبارە حوکمداریی هاوشێوە بۆ کابینەی ئایندە ( هەمان تاس و حەمام ) پرەنسیپەکانی بارزانی ئەکاتە بڵقی سەرئاو، زامنێکیش نییە فەوت و فەنابونیشی بەدوایا نەیەت.

لە کۆبوونەوەکانی گفتوگۆی پێکهاتن و بەشکردنی پۆستەکانی سەرۆکایەتیی پەرلەمان، هەرێم و ئەنجومەنی وەزیراندا، هەمیشە پۆستی سەرۆکایەتیی عێراقیش ئامادەیە، وەک عورفێکی سیاسی بۆ شاری سلێمانی و یەکێتی نیشتیمانی ئەو سەرۆکایەتیە یەکلا بۆتەوە، بۆیە گەر بەشدار و هاوبەش یان برابەشیش بن، یەکێتی هەر دوانی لەو چوارە پێدەبڕێت، هەر چوار پرەنسیپەکەی بافڵی سەرۆکیش ( هاوسەنگی، راستکردنەوەی حوکمڕانی، فەوتی دەسەڵاتی خۆسەپێن و ناڕوونیی داهاتی هەرێم ) وەک چارەنوسی چوار پرەنسیپەکەی سەرۆکی پارتی بەسەردێت و فەوت و فەنابونیش ئایندەیەکی ئامادەتر دەبێت.

قورسترین ئەرک و هەوڵەکانی پارتی و یەکێتی بۆ جێبەجێکردنی بەڵێن و پرەنسیپەکانیان (بۆ یەکێتی زیاتر لە پارتی) بەجیا کۆکردنەوەی "یەک و نیوەیە" لەم حاڵەتەدا (نەوەی نوێ) سەنگ و قورسایی راگرتنی تەرازوی هاوکێشەکەیە، ئەگەر بەڕاستی بۆ یەکەمجار بە دڵسۆزی خاوەنی بەڵێنی خۆیانن؟ نەم بەتەنگ ژیان و مانەوەی خەڵک و خاکی کوردستانەوەن!؟ پێویستە هەریەک لای خۆیەوە لە هەوڵی جێبەجێکردنی ئەو ئەرکە قورس و گرانەدا بێت و ئەویتریش قەبوڵی هاوبەشی و کەمبەشی دەرئەنجامەکانی بکات.

ئاشکرایە (نەوەی نوێ) بە ستوونی و ئاسۆیی، لە هیچ جومگەیەکی دەسەڵاتی جێبەجێکردندا نەبوون و نین، هەر دوو چوار ئامانجەکەی دوو سەرۆکی پارتی و یەکێتیان وەک پرەنسیپ، لە رێککەوتنێکی کۆنکرێتیدا، بە چاودێریی زۆرینەی پەرلەمانی قەبوڵە، مەرجی ئەوەڵ و ئەخیریشیان وەرگرتنی دەسەڵاتی یەکەمی جێبەجێکردنی هەرێمی کوردستانە.

بە پێی شوناس و ناسینی پارتی و یەکێتی، لای خۆیان و خەڵکی کوردستان، رادەستکردنی پۆستی سەرۆکی ئەنجومەنی وەزیران بۆ نەوەی نوێ، خەیاڵ و کاری نەکردەیە، بەڵام لە دنیای حوکمڕانی و پەرۆشی بۆ نیشتیمان و پرۆسەی دروستی حوکمڕانی ( لە پێکنەهاتن و قەبوڵنەکردن )ی دوو هێزی یەکەمدا، ئاسانترین رێگە پەنابردنە بۆ هێزی سێیەم و تەنانەت چوارەم و پێنجەم و هەتا کەسی تەکنۆکراتیش، ئەزمونی حوکمڕانی پێشووی ئەوانیش سەلمێنەری ئەو راستیەیە کە بەهێزی سێیەم نەبێت بەخۆیان ناکرێت و تونێڵێکی تاریک رێی بەردەبازیانە.

کاتێک بەرنامەیەکی گشتویست و گشتگیری خزمەتکردن و مانەوەش مەرج و ئامانجی هەموان بێت، ئیتر عینادی و پاوانکردنی پۆست و دەسەڵات بۆ خزموخوێش سەرەخۆرەیە، جگە لە مانەوەی کیانی گیانێکی داڕزاوی لێواری سەرەمەرگ، هیچیتری لێ سەوز نابێت.

لە دنیادا، دەیان نموونەی لەم جۆرە بۆ پاراستن و دەربازکردنی قەوارەی سیاسی پیادە کراوە، سودانیەکەی سەرۆکی حکومەتی ئێستای عێراقی فیدراڵ، نزیکترین و زیندوترینیانە.