مەسرور بارزانی لە راگەیەندراوەکەیدا باسی لەوەش کردووە، سودانی پیرۆزبایی سەرکەوتنی هەڵبژاردنی پەرلەمانی کوردستانی لێکردووە و وتوویەتی سەقامگیریی سیاسی هەرێمی کوردستان، بنەمایەکی گرنگیی سەقامگیریی هەموو عێراقە.

ئاماژەی بەوەش کردووە، سودانی جەختی لە گرنگیی پێکهێنانی کابینەی نوێی حکومەتی هەرێمی کوردستان کردەوە لە پێناو پەرەپێدانی زیاتری هاریکاری و هەماهەنگیی نێوان هەردوو حکومەتی هەرێم و فیدراڵ .

دەشڵێت، " سەبارەت بە پرسی موچە، جەختمان لە پێویستی دوورخستنەوەی پرسی خەرجکردنی مووچەی هەرێم لە هەر ناکۆکییەکی سیاسی کردەوە، لەبەر ڕۆشنایی بڕیاری دادگای باڵای فیدراڵی ، هاوشێوەی ناوچەکانی دیکەی عێراق."

راشیگەیاندووە، لەگەڵ سودانی گفتوگۆیان لەبارەی کێشە و پرسەکانی تایبەت بە مووچە و پشکی هەرێمی کوردستان لە بودجەی گشتی فیدراڵ، دەستپێکردنەوەی هەناردەکردنی نەوتی هەرێم و ئامادەکارییەکانی سەرژمێری گشتیی دانیشتووان لە عێراق کرد و جەختی لە گرنگیی دەستپێکردنەوەی پرۆسەی هەناردەکردنەوەی نەوت لە زووترین کات و نەهێشتنی ئاستەنگ و کێشەکانی بەردەم پڕۆسەکە کردەوە، بە شێوەیەک کە لە بەرژەوەندی گشت هاوڵاتییانی هەرێمی کوردستان و عێراقدا بێت.