بارانى پەڵە یەکەم بارانى ساڵە و بەزۆرى لە کۆتایی مانگى ١٠ یان مانگى ١١ـدا دەبارێت و ئەگەر شەپۆلەکە بگاتە ئاستى تەڕکردنى نیومەترى ژێر زەوى و نزیکەى ٦٠ ملیم باران ببارێت ئەوا جوتیارەکان و کەشناسەکانیش دەڵێن پەڵەى داوە و بارانى پێویست بۆ سەوزکردنى گەنم و جۆ باریوە.

پێشبینییەکان دەڵێن، لە مانگی ١١ـدا چەند شەپۆلێکى باران روو لە هەرێمى کوردستان دەکات و بارانى پێویست دەبارێت.

هەرچی لە ئاستی رۆژهەڵاتی ناوەڕاستیشە، سەنتەری کەشوهەوای عەرەبی رایگەیاندووە، پێشبینی دەکرێت بەهۆی کاریگەری کەشی ساردی رۆژهەڵاتەوە پلەکانی گەرما داببەزن و بارانبارین و با روو لە زیادبوون بکەن، هەروەها ئەگەری بەفربارینیش لە زستاندا زۆرە.

لەبارەی کەشی عێراق و چەند ناوچەیەکی دیکەی عەرەبییەوە، سەنتەری کەشوهەوای عەرەبی دەڵێت، ناوچەکە بە گشتی لەژێر کاریگەری گۆڕانی کەشوهەوادا دەبێت و بارانبارین لەم مانگەدا بەشێوەی چڕ و جیاواز دەبارێت.

هاوکات، دەزگای گۆڕانی کەشوهەوای کۆپەرنیکۆسی یەکێتیی ئەوروپا دەڵێت، ئەمساڵ بۆ رۆژهەڵاتى ناوەڕاست ساڵێکى ئاسایی دەبێت، واتە باران بەپێى پێویست دەبارێت و وشکەساڵى نابێت، بەڵام رەنگە بڕى باران نەگاتە ساڵى رابردوو.

باران نەک تەنها کشتوکاڵ بەڵکو کاریگەرى زۆریشى لەسەر پەیوەندییە سیاسی و ئابورییەکان لە رۆژهەڵاتى ناوەڕاستدا هەیە، بەتایبەتى لە دوو دەییەى رابردوودا بەهۆى وشکەساڵى و زۆربوونى بەبیابانبوونەوە چیتر ئاو وەک سەرچاوەیەکى سروشتى سەیرناکرێت، بەڵکو یەکێک لە ئامڕازەکانى سیاسەت و کارتى فشارە لە نێو وڵاتاندا و لەسەروو هەموویانەوە رۆژهەڵاتى ناوەڕاست، بۆیە ئەگەر پێشتر تەنها جوتیارەکان دڵیان بە بارینى باران خۆش بوایە، ئێستا هەمووان چاوەڕوانی بارانن و حساب بۆ ساتى بارینى و بڕی بارانەکەش دەکەن.