ئاماژەی بەوەش کرد، سەرەڕای داهاتی ناوخۆ و فرۆشتنی نەوت هاوکات بەغدا پارەیەکی زۆری بۆ هەرێم ناردووە بۆ مووچەی مانگی نۆ، بەڵام پارتی و یەکێتی بە مەبەست مووچە دابەش ناکەن.

باسی لەوەش کرد، هەردوو بنەماڵەی بارزانی و تاڵەبانی گەورەترین مەترسین لەسەر هەرێمی کوردستان و لە خەمی رازیکردنی هاوڵاتیان نین و بیریان تەنها لای پارەیە بۆ گیرفانی خۆیان، ئەگەر لە دەسەڵاتیشدا بمێننەوە، ئەوا لە ساڵێکدا سێ مووچە دابەش دەکەن.

ئەوەشی خستە روو، پارتی و یەکێتی لە ئاستی باڵا رێککەوتوون لەسەر ئەو سیناریۆیەی ئێستا کە لە بانگەشەی هەڵبژاردندا قسە بەیەک دەکەن، بەڵام دوای هەموو هەڵبژاردنێک پارتی و یەکێتی بەیەکەوە نەوت دەفرۆشن و سامانی هەرێم دابەش دەکەن.

راشیگەیاند، پارتی و یەکێتی چێژ لە ئازاردانی هاوڵاتیان و بەتایبەتی مامۆستایان و فەرمانبەران دەبینن، هەر بۆ ئەو مەبەستەش تەوتینی مووچە ناکەن و لیستی مووچە بە رێکوپێکی نانێرن بۆ بەغدا.

رێبوار ئەورەحمان ئاماژەی بەوەش کرد، فراکسیۆنی نەوەی نوێ تاکە لایەنە خانەنشینیی پەرلەمانی رەتکردووەتەوە، خاوەن بەڵێنەکانی بووە و خۆی نەفرۆشتووە، هەر یەکەم لایەنیش بوو کە ١١٩ واژۆی کۆکردەوە بۆ بەبانکیکردنی مووچەی فەرمانبەرانی هەرێم.

وتیشی، بۆ باشکردنی ئێستا و داهاتووی هەرێم پێویستە هاوڵاتیان بەرێژەیەکی زۆر بەشداری هەڵبژاردن بکەن و نەوەی نوێ بکەن بە هێزی یەکەم.

باسی لەوەش کرد، پارتی و یەکێتی کار لەسەر بێ ئومێدکردنی هاوڵاتیان دەکەن بەشداری هەڵبژاردن نەکەن، بەڵام گۆڕانکاری و پێچەوانەکردنی هاوکێشەکە بە بەشداریکردنی هاوڵاتیان لە هەڵبژاردندا دێتە کایەوە.