بەهۆی ئەو شەپۆلە زریان و بارانەی چەند ناوچەیەکی باشوور و خۆرهەڵاتی ئاسیای گرتووەتەوە، لە ویلایەتی گوجەراتی هیندستان ٢٨ کەس گیانیان لەدەستداوە، لەلایەکی دیکەشەوە دۆخی لەناکاو لە دوورگەی کیوشوی ژاپۆن راگەیەنراوە.
بەهۆی شەپۆلێکی چڕی بارانبارین و رەشەبای بەهێزەوە لە هیندستان لافاو دروست بووە و بەرپرسانی وڵاتەکەش رایانگەیاندووە، لە ویلایەتی گوجەرات ١٣ کەس بەهۆی لافاو و ١٥ کەسی دیکە بەهۆی کەوتنی دار بەسەریاندا، گیانیان لەدەستداوە.
ئاماژە بەوەشدەکەن،
تاوەکو ئێستا تیمەکان هەزار و ٨٥٦ کەسیان رزگار کردووە.
فادورادا یەکێکە لەو
ناوچانەی زۆرترین زیانیان بەرکەوتووە لە زریان و لافاوەکەدا و بەهۆیەوە هێڵەکانی
گەیاندنی کارەبا لە نزیکەی هەزار گوندی ناوچەکەدا پچڕاون.
شەپۆلەکە ژاپۆنیشی
گرتووەتەوە و کەشناسی وڵاتەکە رایەگیاندووە، بەهۆی شەپۆلی باران و زریانەوە نزیکەی
٢٥٠ هەزار ماڵ بێکارەبا بوون و دۆخی لەناکاو راگەیەنراوە. داواش لە نزیکەی چوار ملیۆن هاوڵاتی نزیک ناوچەی مەترسییەکان دەکەن، ماڵەکانیان چۆڵ بکەن.
دەشڵێت، خێرایی با لەو
ناوچانەدا گەیشتووەتە ٢٥٢ کیلۆمەتر لە کاتژمێرێکدا و بەهۆیەوە چەندین خانوو رووخاون
و چەندین زەویش داڕماون.
شەپۆلەکە بە یەکێک لە بەهێزترین شەپۆلەکان دادەنرێت کە ژاپۆنی گرتووەتەوە و بەهۆیەوە تاوەکو ئێستا کەسێک بێسەروشوێنە و ٤٧ برینداریش تۆمارکراون.
پێشبینیش دەکرێت، تاوەکو
سبەینێ هەینی، شەپۆلەکە روو لە زیادبوون بکات و بە بەرزی زیاتر لە یەک مەتر باران ببارێت، بەوهۆیەوە سەرجەم ناوچەکان خراونەتە
دۆخی ئامادەباشی خێراوە.