هاوکات، بەهۆی پێداگری سوپای سودان و هێزەکانی پشتیوانی خێرا، هەوڵە نێودەوڵەتییەکان بۆ راگرتنی شەڕ شکستیان هێناوە و رێڕەوی گەیاندنی هاوکارییە مرۆییەکان بەڕووی دانیشتوانی سودان داخراوە.

پێشتریش، رێکخراوی کۆچی جیهانی کە بەشێکە لە رێکخراوی نەتەوە یەکگرتووەکان رایگەیاند، سودان لە خاڵێکی داڕمانی کارەساتباردایە و سودانییەکان رووبەڕووی برسێتی و ئاوارەبوون و قەیرانی مرۆیی بوونەتەوە. وتیشی، ئەگەر ململانێکان و رێگرییەکان دژی گەیاندنی هاوکارییەکان بەردەوام بن، دۆخەکە خراپتر دەبێت.

لە ١٤ـی نیسانی ساڵی ٢٠٢٣ـەوە جەنگ لەنێوان سوپای سودان و ‌هێزەکانی پشتیوانی خێرا بەهۆی هەوڵەکان بۆ یەکخستنی هێزە ئەمنییەکان و دامەزراندنی هێزی پشتیوانی خێرا وەک بەشێك لە سوپا دەستی پێکردووە و بەهۆیەوە هەزاران خێزانی سودانی ئاوارە بوون و هەزاران سودانی گیانیان لەدەستداوە و بریندار بوون.

لەلایەکی دیکەوە جەنگی نەتەوەیش لە سودان سەری هەڵداوە، ئەو وڵاتە زیاتر لە ٤٥ ملیۆن کەسی تێدا دەژی کە دابەش بوون بەسەر ٥٦ نەتەوەی جیاواز و ٥٧٠ تیرەی جیاواز پێکدەهێنن، هەریەک لەو نەتەوە و تیرە جیاوازانەش پاڵپشتی لایەنێکی جیاواز دەکەن و بووتەنە هۆی هەڵگیرسانی شەڕی نەتەوەیی.