ئاماژە بەوەش کراوە، فڕۆکەکان سێ جار شوێنەکەیان بۆردوومان کردووە و بەهۆیەوە زیاتر لە ١٠٠ کەس گیانیان لەدەستداوە و دەیانى دیکەش بریندار بوون.

لەبەرامبەردا سوپاى ئیسرائیل بڵاوی کردەوە، چەکدارەکانى حەماس شوێنى مانەوەى ئاوارەکانیان لەو خوێندنگەیە بۆ خۆحەشاردان بەکارهێناوە، ئەوانیش بەپێى زانیارى هەواڵگرى شوێنەکەیان بۆردوومان کردووە.

لایخۆشییەوە، دەزگای فریاگوزاری و کاروباری نەتەوە یەکگرتووەکان بۆ پەنابەرانی فەڵەستین (ئۆنروا) رایگەیاند، بەهۆی بۆردوومانکردنی خوێندنگەیەک لە رۆژهەڵاتی غەززە لەلایەن ئیسرائیلەوە، دەیان فەڵەستینی گیانیان لەدەستدا کە منداڵ و پیریان تێدا بووە. وتیشی، پێویستە ئەم کارە دڕندانە کۆتایی پێبهێنرێت و چیتر خوێندنگا و دامەزراوەکانی نەتەوە یەکگرتووەکان و ژێرخانی مەدەنی نەکرێنە ئامانج.

ئەوەش لەکاتێکدایە، ماوەی زیاتر لە نۆ مانگە جەنگی حەماس و ئیسرائیل بەردەوامی هەیە و دوایین ئاماری قوربانیانی جەنگی غەززەش ئاشکرای کردووە، تا ئێستا نزیکەی ٤٠ هەزار کەس گیانیان لەدەستداوە و زیاتر لە ٩١ هەزار کەسی دیکەش بریندار بوون، لە ئیسرائیلیش هەزار و ١٣٩ کەس گیانیان لەدەستداوە و هەشت هەزار و ٧٣٠ کەسیش بریندار بوون.