هاوکات، وڵاتی قەتەر کە یەکێک بوو لە وڵاتە نێوەندگیرەکان بۆ پێکهێنانی ئاگربەسەت لەدوای کوژرانی هەنیە ئاماژەی بەوە کرد، کوشتنی هەنیە هەڵچونێکی مەترسیدارە و "چۆن دەتوانرێت دانوستان بۆ ئاگربەست ئەنجام بدرێت لەکاتێکدا دانوستانکارەکە بکوژرێت؟".

لای خۆشیەوە، بنیامین ناتانیاهۆ سەرۆک وەزیرانی ئیسرائیل لەدوای کوژرانی هەنیە رایگەیاند، جەنگ درێژە دەکێشێت و ئامادەن بۆ هەموو ئەو سیناریۆ و هەڕەشانەی رووبەڕوویان دەبێتەوە. وتیشی، "ئێمە حسابی خۆمان لەگەڵ هەموو ئەو کەسانە یەکلا دەکەینەوە کە زیانیان بە ئیسرائیل گەیاندووە".

لەوبارەیەشەوە، عەلی خامنەیی رابەری باڵای شۆڕشی ئیسلامی ئێران باسی لەوە کرد، بە کوژرانی ئیسماعیل هەنیە ئیسڕائیل سزایەکی توندی بۆ خۆی ئامادە کرد و ئێران بە ئەرکی خۆی دەزانێت تۆڵەی کوژرانی هەنیە بکاتەوە، چونکە لەناو خاکی ئێراندا بە ئامانج گیراوە.

سەرەرای ئەو لێدوانانە، تاوەکو ئێستا هیچ بەرپرسێکی ئیسڕائیل بە دیاریکراوی لەبارەی کوژرانی هەنیەوە لێدوانی فەرمی نەداوە.

ئەوەش لەکاتێکدایە، بەرەبەیانی دوێنێ چوارشەممە، بزوتنەوەی حەماس لە راگەیەنراوێکدا ئاماژەی بەوە کرد، ئیسماعیل هەنیە کە بۆ ماوەی زیاتر لە حەوت ساڵ سەرۆکی مەکتەبی سیاسیی بزوتنەوەکەیان بوو، لە تارانی پایتەختی ئێران لە هێرشێکدا کوژراوە.