کۆشکی سپی رایگەیاند، لە کۆبوونەوەی سەرۆکی ئەمریکا و سەرۆک وەزیرانی ئیسرائیلدا سەرۆکی ئەمریکا جەختی لە ئەنجامدانی ئاگربەست کردووەتەوە بە زووترین کات.
ئەمڕۆ هەینی، کۆشکی سپی لە راگەیاندراوێکدا ئاماژەی بەوە کردووە لە کۆبوونەوەی نێوان جۆ بایدن سەرۆکی ئەمریکا و بنیامین ناتانیاهو سەرۆک وەزیرانی ئیسرائیلدا بایدن داوایکردووە بە زووترین کات ئەوە بۆشاییە ئەمنییانەی هەن پڕبکرێنەوە و ئاگربەست ئەنجام بدرێت.
باس لەوەش کراوە، بایدن داوایکردووە بە زووترین کات خاڵی کۆتایی بۆ جەنگی
غەززە دابنرێت و دیلەکانیش بگەڕێنەوە ماڵەکانیان و کۆتایی بە قەیرانی مرۆیی بهێنرێت.
بەپێی راگەیاندراوەکەی کۆشکی سپی بایدن ئاماژەی بەوە کردووە، پێویستە رێگە
بدرێت هاوکارییە مرۆییەکان بە ئاسانی و بەبێ رێگر ببرێنە نێو غەززە و گیانی
هاوڵاتیانی مەدەنی بپارێزرێت.
ئەوەشی خستووەتە روو، "ئەمریکا
بە توندی پابەندە بە ئاسایشی ئیسرائیل لە بەرامبەر هەموو هەڕەشەکانی گروپە
چەکدارەکان".
دوێنێ بنیامین
ناتانیاهو سەرۆک وەزیرانی ئیسرائیل سەردانی ئەمریکای کرد و لە کۆنگرێسی ئەو وڵاتە
وتارێکی پێشکەش کرد و لەگەڵ جۆ بایدن سەرۆکی ئەمریکا و کاملا هاریس جێگری سەرۆکی
ئەمریکا و ئیلۆن مەسک خاوەنی کۆمپانیاکانی ئێکس و سپەیس ئێکس و تێسلادا کۆبووەوە.