٢٧٣ رۆژ بەسەر جەنگی غەززە تێپەڕ دەبێت و بەپێی دوایین ئامارەکانی وەزارەتی تەندروستیی فەڵەستین، بەهۆی بەردەوامی جەنگەوە، ژمارەی گیانلەدەستدان لە کەرتی غەززە ٣٨ هەزار کەسی تێپەڕاندووە.
ئەمڕۆ هەینی، وەزارەتی تەندروستیی فەڵەستین راگەیانراوێکی بڵاوکردەوە و تێیدا هاتووە، لە ئەنجامی بەردەوامی جەنگ و هێرشەکانی ئیسرائیل بۆ سەر ناوچەکانی کەرتی غەززە، بەپێی دوایین ئامارەکان ژمارەی گیانلەدەستدان گەیشتووەتە ٣٨ هەزار و ١١ کەس.
ئاماژە بەوەش
کراوە، هاوشێوەی ژمارەی گیانلەدەستدان، ژمارەی ئەو کەسانەی کە بەهۆی بەردەوامی هێرشەکانی
ئیسرائیل بۆ سەر کەرتی غەززە بریندار بوون بەرز بووەتەوە و گەیشتووەتە ٨٧ هەزار و
٤٤٥ کەس.
باس لەوەش
کراوە، بە تەنها لە ٢٤ کاتژمێری رابردوودا، هێزەکانی ئیرائیل چوار کۆمەڵکوژییان لە
غەززە ئەنجام داوە و بەهۆیەوە ٥٨ کەس گیانیان لەدەستداوە و ١٧٩ کەسی دیکەش بریندار
بوون.
هاوکات،
بزووتنەوەی حەماس لە کۆنفرانسێکی رۆژنامەنووسیدا رایگەیاند، رێگە بە چوونە ناوەوەی
هیچ هێزێکی بیانی بۆ غەززە نادەن لەدوای کۆتایی هێنان بە جەنگ و دەستدرێژییەکانی ئیسرائیل
بۆ سەر ناوچەکە بە مەبەستی ئیدارەدانی غەززە. وتیشی، " بەڕێوەبردنی کەرتی غەززە
تەنها پرسێکی فەڵەستینییە و گەلی فەڵەستین بە تەواوی کۆکن لەسەر ئەو بابەتە".
لای خۆشیەوە،
سوپای ئیسڕائیل رایگەیاند، لە رۆژی ٧ـی تشرینی یەکەمی ساڵی رابردووەوە کە دەکاتە سەرەتای
جەنگی غەززە تاوەکو ٢٧ـی حوزەیران، ٦٦٧ سەرباز و ئەفسەری سوپای ئیسڕائیل گیانیان لەدەستداوە
و سێ هەزار و ٩٤٤ سەرباز و ئەفسەری دیکەش بریندار بوون.
ئەوەش لەکاتێکدایە،
جەنگی نێوان حەماس و ئیسرائیل لە رۆژی ٧ـی تشرینی یەکەمی ساڵی رابردووەوە سەری هەڵداوە
و ماوەی زیاتر لە هەشت مانگە جەنگەکە بەردەوامە.