AM:09:41:26/04/2024
2228 جار خوێندراوەتەوە
بانکی ناوەندی عێراق رایگەیاند، هەر هاوڵاتییەک بەرپرسە لە بەکارهێنانی کارتە بانکییەکەی لە هەر مامەڵەیەکدا و لە ئەگەری بەکارهێنانی هەژماری بانکی و کارتی ئەلیکترۆنی کە رێگەخۆشکەر بێت بۆ پارەسپیکردنەوە رووبەرووی رێکاری یاسایی دەکرێتەوە، بەتایبەت ئەو هەژمارە بانکیانەی کە لەدەرەوەی وڵات کراونەتەوە.
ئەمڕۆ هەینی، بانکی ناوەندی عێراق هۆشدارییەکی لەبارەی کارتی ئەلیکترۆنی بڵاوکردەوە و تێیدا هاتووە، بەمەبەستی کۆنترۆڵکردن وکەمکردنەوەی رێژەی سپیکردنەوەی پارە و مامەڵەداراییە ناوخۆییەکان راپۆرتی مانگانە لەبارەی هەژمارەکان بۆ دادوەری لێکۆڵینەوەی دراوەکان بەرزدەکرێتەوە.
ئاماژە بەوەش کراوە، هەر هاوڵاتیەک بەرپرسە لەو هەژمارەی کە بەناوییەوە کراوەتەوە
و لە هەر مامەڵەیەکی دارایی کە پێچەوانەی یاساکان و سیاسەتی بانکی ناوەندی بێت بە
گوێرەی یاسای ژمارە ٣٩ـی ساڵی ٢٠١٥ـی سپیکردنەوەی پارە مامەڵەی لەگەڵدادەکرێت.
باس لەوەش کراوە، سەرجەم ئەو هەژمارە بانکیانەی کە لەدەرەوەی وڵاتدا کراونەتەوە
و بۆ سپیکردنەوەی پارە بەکاردەهێندرێت رووبەرووی رێکاری یاسایی دەکرێنەوە.وتیشی،
" پێویستە هەر هاوڵاتیەک بەرپرسیارێتی بەرامبەر بە مامەڵەداراییەکانی خۆی هەڵبگرێت
بە پێچەوانەوە بە تۆمەتی سپیکردنەوەی دراوی ناوخۆی و بیانی بە گوێرەی یاسای سزادانی
عێراقی خۆی و هەڵگری کارتە بانکییەکە رووبەرووی سزادەبنەوە".
ئەوەش لە کاتێکدایە، رۆژی ٢٠ـی نیسان چاوگێک لە بانکی ناوەندی بە دیجیتاڵ میدیای
ئێن ئاڕ تی راگەیاند، سەرجەم ئەو هەژمارە بانکیانەی کە لەدەروەی وڵاتکراونەتەوە و
لە رێگایانەوە حەواڵەی ناوخۆی و دەرەکی ئەنجامدەدرێت بۆ ئاڵوگۆڕی دراو خاوەنەکانیان
رووبەرووی رێکاری یاسایی دەکرێنەوە بە تۆمەتی سپیکردنەوەی دراوەکان.
