وەزارەتی تەندروستی فەڵەستین رایگەیاند، ژمارەی گیانلەدەستدان بەهۆی بەردەوامی هێرشەکانی ئیسرائیل بۆ سەر کەرتی غەززە ٣٤ هەزار کەسی تێپەڕاندووە، ژمارەی بریندارەکانیش گەیشتووەتە ٧٦ هەزار و ٨٣٣ کەس.
ئەمڕۆ هەینی، وەزارەتی تەندروستی فەڵەستین لە راگەیەنراوێکدا بلاویکردەوە، بەپێی دوایین ئامارەکان، لە ئەنجامی بەردەوامی هێرش و بۆردومانەکانی هێزەکانی ئیسرائیل بۆ سەر ناوچەکانی کەرتی غەززە ژمارەی گیان لەدەستدان گەشتووەتە ٣٤ هەزار و ١٢ کەس.
ئاماژە بەوەش کراوە، ژمارەی بریندارەکان بەهۆی بەردەوامی
هێرشەکان گەیشتووەتە ٧٦ هەزار و ٨٣٣ کەس.
باس لەوەش کراوە، لە ماوەی ٢٤ کاتژمێری رابردوودا لە
ئەنجامی بۆردوومانەکانی ئیسرائیل ٤٢ کەس گیانیان لەدەستداوە و ٦٣ کەسی دیکەش
بریندار بوون.
سەبارەت بە ئاگربەست، رۆژی ١٤ـی نیسان نوسینگەی سەرۆک وەزیرانی
ئیسڕائیل لەبارەی دانوستانەکان بۆ پێکهێنانی ئاگربەست رایگەیاند، حەماس دوایین پێشنیازەکانی
ئاگربەستی لە غەززە رەت کردووەتەوە و بە مەرجەکانی ئیسڕائیل رازی نەبووە.
لە رۆژی ٧ـی تشرینی یەکەمی ساڵی رابردوودا چەکدارانی حەماس
هەزاران مووشەکیان ئاڕاستەی ئیسڕائیل کرد و لەبەرامبەریشدا ئیسڕائیل دەستی بە هێرش
کردن بۆ سەر کەرتی غەززە کرد و بەهۆی هێرشەکانەوە هەزاران کەسی مەدەنی گیانیان لەدەستداوە
و زیاتر لە ملیۆنێک کەسیش ئاوارەی ناوچەی رەفەح لە باکوری کەرتی غەززە بوون و لە ئێستادا
ئیسرائیل لە پلانیدایە هێرش بۆ سەر ناوچەی رەفەح دەست پێ بکات.