بۆ چوارەم رۆژ لەسەر یەک هاوڵاتیانی قەزای پێنجوێن بەردەوامن لە دەربڕینی ناڕەزایەتییەکانیان دژی نەبوونی خزمەتگوزاری و خۆپیشاندان دەکەن.
ئەمڕۆ شەممە، بۆ چوارەم رۆژ لەسەریەک هاوڵاتیانی قەزای پێنجوێن بەردەوامن لەسەر خۆپیشاندان و دەربڕینی ناڕەزایی و داوای کارەبای ٢٤ کاتژمێری و جێبەجێکردنی خزمەتگوزاری دەکەن بۆ قەزاکەیان و دەشڵێن، بەردەوام دەبن.
ئەو هاوڵاتیانە بە شەو و رۆژ لە جێگای خۆپیشاندانەکە دەمێننەوە و رێگای بەشێکی بارهەڵگرەکانیان
گرتووە و رێگا نادەن هاتوچۆی بازرگانی بکرێت.
شەوی رابردووش،
زانا رەحمان قائیمقامی قەزای پێنجوێن لە بڵاوکراوەیەکدا لە تۆڕی کۆمەڵایەتی فەیسبووک دەستبەرداربوونی خۆی لە پۆستی
قائیمقامی قەزاکە راگەیاند و دەڵێت، بەهۆی "وەڵامنەدانەوەی هاوڵاتیانی پێنجوێن
دوای سێ رۆژ لە خۆپیشاندان ئەو بڕیارەی داوە."
باسی لەوەش کردووە،
بەرپرسانی سەروو خۆی کەمتەرخەمن و نەهاتوون بەدەم داواکارییەکانی خەڵکی قەزای پێنجوێنەوە.
لە رۆژی چوارشەممەی
هەفتەی رابردوو هاوڵاتیانی قەزای پێنجوێن دەستیانکرد بە خۆپیشاندان و داوای کارەبای
٢٤ کاتژمێری و جێبەجێکردنی خزمەتگوزارییە پێویستەکان لەو قەزایەدا دەکەن.
ئەمەش لە کاتێکدایە،
کارەبای قەزای پێنجوێن لە رابردوودا ٢٤ کاتژمێری بووە و لە ئێستادا سێ کاتژمێر کارەباکەیان
لێ کەمکراوەتەوە.