زەویە نەوتیەکانی شێخان پێكدێن لە زەوی مرێبا کە دەکەوێتە سنوری ناحیەی قسرۆك لە نزیك گوندەکانی بێتاس و مغار لە نزیك پەرستگای لالش لە ١٢ بیری نەوت پێكدێت و لەلایەن کۆمپانیای گۆلف کەی ستونی بەریتانی کاری بەرهەمهێنانی تێدا دەکرێت و رۆژانە ٥٠ هەزار بەرمیلی لێ بەرهەم دەهێنرێت و چاوەروان دەکرێت رێژەی بەرهەمی بۆ ٦٠ هەزار بەرمیل لە رۆژێکدا بەرزبێتەوە.

زەوی ئەتروش، ئەم زەویە دەکەوێتە نێوان هەردوو ناحیەی ئەتروش و چەمانکێ و ١٠ بیری نەوتى تێدایە، کۆمپانیاکانی تاقەی ئیماراتی و جەرال و حکومەتی ماوەبەسەرچووى هەرێم کاری بەهەرمهێنانی تێدا دەکەن و رۆژانە ٤٥ هەزار بەرمیل نەوتى تێدا بەرهەم دەهێنرێت .

ناوچەى سمرت، دەکەوێتە سەر چیای باعەدر لە سەنتەری ناحیەکەوە، خاوەن ٥ بیری نەوتە و رۆژانە ١٥ هەزار بەرمیلی تێدا بەرهەم دەهێنرێت، کە لە سەدا ٦٠ی لەلایەن کۆمپانیای هاند ئۆیلی ئەمریکیەوە بەرهەمدەهێنرێت و سەدا ٢٠ ی کۆمپانیا عەفرین و سودا لەسەدا ٢٠یشی لەلایەن حکومەتی هەرێمەوە بەرهەم دەهێنرێت .

لەگەڵ ئەم داهاتە گەورەیەی نەوت، تا ئێستا قەزای شێخان پێویستی بە خزمەتگوزاری سەرەکی هەیە و بەپێی خەملاندنەکان لە سەدا ٢٤ی خەڵکی ئەم سنورە بە خاوەن بروانامە بەرزەکان و بێ بروانامەکانیش بێ کارن.

وەك هاولاتیان دەلێن، نازانن داهاتی قەزاکەیان بۆ کوێ دەچێت و چۆن خەرج دەکرێت و هیچ سوودێکی بۆ ئەوان نەبووە.