فەلاحی ئاماژەی بەوەشکرد،گۆڕانی کەش و هەوا گرنگترین و گەورەترین گرفتە لەم کاتەدا بەرۆکی عێراقی گرتبێت و ئەوەش بەڕوونی لەبەرزی پلەکانی گەرمادا دەبینرێت لەکاتێکدا لەماوەی پێشتردا بەوشێوەیە نەبووە، ئەمەش بووە بەهۆی زیادبوونی دیاردەی بەبیابانبوون و لەناوچونی زەوییە کشتوکاڵییەکان بەهۆی وشکە ساڵیی و زیادبوونی گەردەلوولە لماوییەکان و شەپۆلەکانی خۆڵبارین.

باسی لەوەشکرد، قەبارەی زیانە ئابوورییەکانی گۆڕانی کەش و هەوا بە رێژەیەکی بەرزە و رۆژانە ١٠ ملیار دینار زیان بە ئابووری عێراق دەگەیەنێت ئەوەش بەهۆی کاریگەرییەکانی لە سەر تەندرووستی هاوڵاتیان بەڕێژەیەکی بەرچاو لەڕووی سیستمی هەناسەدان و رەبۆ و هەستیاری کە بەهۆی گەردەلوولە لمییەکان و شەپۆلەکانی خۆڵبارینەوە روودەدات، هاوکات داواکاری لەسەر دەرمان و چارەسەر بەرزدەکاتەوە لەهەمانکاتدا گواستنەوەی دەرمانەکانیش لەڕێگەی ئاسمانی و وشکانییەوە زیانێکی زۆر دەگەیەنێت.

ئەمەش لە کاتێکدایە، لەسەرەتای ئەمساڵدا حکومەتی عێراق رایگەیاند، رووبەری ئەو زەویانەی پلانی کشتوکاڵی وەرزی دەیانگرێتەوە بۆ نیوە کەمیکردووە، لەئەنجامی بڕینی لقەکانی ڕووباری دیجلە لەئێران و بەهۆی وشکەساڵییەکی بێ وێنە کە تووشی وڵاتەکە بووە هەندێک لە پارێزگاگان بە تەواوی ئەو زەویانەیان لەدەستداوە.

هاوکات، حکومەتی عێراق یەکێکە لەو وڵاتانەی زۆرترین کاریگەری گۆڕانەکانی کەشوهەوای لەسەرە و بەڕێژەیەکی بەرز تووشی وشکەساڵی هاتووە و پلەکانی گەرماش لەوەرزی هاویندا بۆ زیاتر لە ٥٠ پلەی سەدی بەرزدەبێتەوە.

لەمانگی تشرینی دووەمی رابردووشدا بانکی نێودەوڵەتی هۆشداردا لەبارەی کەمبوونەوەی دەرامەتەئاوییەکانی عێراقەوە و رایگەیاند هەتا ساڵی ٢٠٥٠ عێراق ٢٠٪ی سەرچاوە ئاوییەکانی بەهۆی گۆڕانی کەش و هەواوە لەدەست دەدات.