بەرگریی شارستانیی هەرێم چوار رێنمایی بۆ وەرزی بەهار بڵاوکردەوە داوادەکات رەچاوی بکەن.
ئەمڕۆ سێشەممە ١٨ـی ئازارـی ٢٠٢٥، بەڕێوەبەرایەتیی گشتیی بەرگریی شارستانیی هەرێمی کوردستان بڵاویکردەوە، لەگەڵ نزیکبوونەوەمان لە نەورۆز و ساڵی نوێی کوردی کە دەستپێکی وەرزی بەهارە، کەشوهەوا فێنک دەبێت و، دەشتودەرەکان لەبار و سەوز دەبن بۆ گەشتکردن و بەسەربردنی کات لەنێو سروشت.
ئاماژەی بەوەشکرد، لەپێناو سەلامەتیی خۆتان و
دەوروبەرتان، گرنگە رەچاوی ئەم رێنماییانەی بەرگریی شارستانی بکەن بۆ وەرزی بەهار:
١ـ مەترسییەکانی ئاگر: لەکاتی چوونەدەرەوە
بەمەبەستی کاتبەسەربردن، نابێت لە شوێنی وشک، یاخود نزیک لە پووش و پەڵاش ئاگر
هەڵبکرێت، هەروەها دڵنیاببەوە لەوەی لەدوای خۆت بەتەواوی ئاگرەکە بکوژێنیتەوە.
٢ـ سەلامەتیی رێگاوبان: بەهۆی بارانی بەخوڕی
بەهاران، رێگاوبانەکان خلیسک دەبن، بۆیە بەوریاییەوە شۆفێری بکەن و بەتەواوی
رەچاوی رێنماییەکانی هاتووچۆ بکەن.
٣ـ ئاگاداری مێروو و خشۆکەکان بن: بەهۆی
بەرزبوونەوەی پلەکانی گەرما لە وەرزی بەهار، مێرووە زیانبەخش و گیانەوەرە خشۆکەکان
لە وەرزی متبوون دێنەدەرەوە و لەکاتی چوونەدەرەوە بۆ نێو سروشت، یاخود شاخەوانی،
پێویستە بەوریاییەوە هەڵسوکەوت بکەن.
٤ـ ئاگاداری بەنزین و سووتەمەنی بن: نابێت لەکاتی
چوون بۆ گەشت و سەیران، بەنزین لەنێو بوتڵی ئاو هەڵبگریت، چونکە منداڵان ناتوانن
جیاوازیی لەنێوان ئاو و بەنزیندا بکەن و بەهۆیەوە ساڵانە چەندین رووداوی نەخوازراو
روودەدات.