بەڕێوەبەرایەتیی هاتوچۆی سۆران رایگەیاند، بەهۆی رووداوێکی هاتوچۆوە لەسەر رێگەی سۆران - خەلیفان نۆ کەس بریندار بوون. چاوگێکیش لە نەخۆشخانەی ئاشتیی سۆران بە ئێن ئاڕ تی راگەیاند، برینی دووان لە بریندارەکان سەختە و رەوانەی هەولێر کراون.
ئەمڕۆ سێشەممە، بەڕێوەبەرایەتیی هاتوچۆی سۆران راگەیەنراوێکی بڵاو کردووەتەوە و تێیدا هاتووە، لەسەر رێگەی سۆران - خەلیفان لە گەلی عەلی بەگ رووداوێکی هاتوچۆ لە جۆری لێکدان روویداوە.
ئاماژە بەوەش کراوە، رووداوەکە لە جۆری لێکدان بووە و لە نێوان ئۆتۆمبێلێکی
جۆری تۆیۆتا لاندکروزەر و نیسان سەنیدا روویداوە، بەهۆی رووداوەکەشەوە نۆ کەس
بریندار بوون.
لەبارەی دۆخی بریندارەکانیش، چاوگێک لە نەخۆشخانەی فێرکاریی ئاشتیی سۆران
بە ئێن ئاڕ تی راگەیاند، نۆ بریندار گەیەنراونەتە نەخۆشخانەکەیان و دووان لە
بریندارەکان بەهۆی سەختی برینەکانیانەوە رەوانەی هەولێر کراون.
وتیشی" دۆخی بریندارەکانی دیکە جێگیرە و چارەسەری پێویستیان بۆ
دەکرێت".
رووداوەکانی هاتوچۆ ساڵانە دەبنە هۆی
گیانلەدەستدان و برینداربوونی سەدان کەس لە هەرێمی کوردستان، هۆکاری زۆرینەی
رووداوەکانیش، خراپی دۆخی رێگاوبانەکانی هەرێمی کوردستانە.
کەریم کەیفی - سۆران