میدیاکانی ئیتاڵیا رایانگەیاندووە، سەرۆکی پێشووتری پەرلەمانی وڵاتەکە کە لەماوەی ساڵانی ١٩٩٤ بۆ ١٩٩٦ سەرۆکی پەرلەمان بووە، بە تۆمەتی ساختەکاری و خۆدزینەوە لە باج بە چوار ساڵ زیاندانیکردن سزادراوە.
میدیاکانی ئیتاڵیا ئاماژەیان بەوەکردووە، سکاڵاکە لە ساڵی ٢٠١٦ـەوە لەسەر ئیرینی بیفیتی سەرۆکی پێشووتری پەرلەمان و شەش کەسی دیکە تۆمارکراوە.
سکاڵاکە تۆمەتی ئەوەی خستوونەتەپاڵ، کە کڕین و
فرۆشتینیان بە سێ ئۆتۆمبێلی جۆری 'فێراری گران توریزمۆ'وە کردووە، کە ئەو
کڕین و فرۆشتنە بەمەبەستی سپیکردنەوەی پارە بووە و هەروەها مامەڵەکردن بە کڕین و
فرۆشتنی چەند کۆمانیایەک بۆ خۆدزینەوە لە باجدان و بەدەستهێنانی داهات بە رێگەیەکی
نایاسایی.
بەپێی هەواڵی میدیاکان، چەند کەسێکی دیکەش لەم کەیسەدا
تێوەگلاون، لەوانەش خاوەنی ئەو کۆمپانیایەی نێوەندگیری کڕین و فرۆشتنەکانی کردووە
بە چین بە ناوی only italia هەروەها لیۆناردۆ ئیسیۆلانی شۆفێری بەناوبانگی پێشبڕکێکانی
ئۆتۆمبێل.
ئەگەر سزاکەش بە تەواوەتی بەسەر بیفیتیدا جێبەجێ بکرێت،
ئەوا دەست بەسەر سەروەت و سامانەکەیدا دەگیرێت کە بە ٣.٤ ملیۆن یۆرۆ مەزەند
دەکرێت.
ئیرنی بیفیتی؛ رۆژنامەنووس و سیاسەتمەداری ئیتاڵیا،
لەدایکبووی ساڵی ١٩٦٣یە و لە ساڵی ١٩٩٢دا خۆی بۆ بوون بە ئەندامی پەرلەمانی
ئیتاڵیا کاندیدی کردووە، دواتر لە نێوان ساڵانی ١٩٩٤ تاوەکو ١٩٩٦ سەرۆکایەتی
پەرلەمانی بەدەستەوە بووە و لەدوای ساڵی ٢٠٠١یشەوە دەستی کردووەتەوە بە کاری
راگەیاندن و بەرنامەیەکی تەلەفزیۆنی تایبەتی پێشکەش کردووە.