ئاماژەیان بەوەش کرد، رێککەوتنی ئەمنیی نێوان عێراق و ئێران وەک خۆی جێبەجێ دەکرێت و بۆ ئەو مەبەستەش، هەنگاوەکانیان بۆ پاراستنی سەروەری یەکتری چڕتر دەکەنەوە و هەوڵیش دەدەن وەک هەماهەنگێک بۆ پاراستنی ئاسایشی ناوچەکە هەنگاو بنێن.

محەمەد شیاع سودانی ؛

محەمەد شیاع سودانی، سەرۆک وەزیرانی عێراق لە میانەی کۆنفرانسەکەدا رایگەیاند، عێراق پابەندە بە رێککەوتنی ئەمنی و بۆ ئەو مەبەستەش رێگە بە هیچ وڵات و گروپێک نادەن خاکی عێراق بۆ ململانێکانیان بەکار بهێنن، چونکە عێراق سەروەری و سەلامەتی ئێران دەپارێزێت.

ئاماژەی بەوەش کرد، لەپاڵ رێککەوتنی ئەمنی، هەوڵ دەدەن سنوور و دەروازە سنورییەکانی نێوان ئێران وعێراق بە گوێرەی رێککەوتنەکە چالاک بکەن و بۆ ئەو مەبەتەش ئاسایشی سنوورەکان چڕتر دەکەنەوە و رێگە بە هیچ جوڵەیەکی بازرگانی و گەشتیاری ناڕوون نادرێت کە ببێتە هۆی مەترسی بۆ سەر رێککەوتنەکانیان.

مەسعود پزیشکیان؛

نۆیەم سەرۆک کۆماری ئێران، لە میانەی کۆنفرانسە رۆژنامەنووسیەکەدا رایگەیاند، ئێران وعێراق گەیشتوونەتە رێککەوتنێکی هاوبەش و بۆ ئەو مەبەستەش ١٤ یاداشتنامەی لێکتێگەیشتنیان واژۆ کردووە.

باسی لەوەش کرد، لەمەو دوا عێراق و ئێران پێکەوە دەبنە پردی پەیوەندی ئابووری و ئاسایشی نێوان ئاسیا، ئەفریقا و ئەوروپا کە لە ئێستادا سەرۆک وەزیرانی عێراق هەوڵەکانی چڕتر کردووەتەوە و هەماهەنگی تەواوی ئەمنی و ئابووری بۆ رێککەوتنەکە دەربڕیوە.

ئەوەشی خستە روو، لەگەڵ عێراق بابەتی بەقاچاخبردن لە سنوورەکانی عێراق و ئێران کۆتایی پێ دەهێنین، بۆ ئەو مەبەستەش عێراق و ئێران لیژنەی ئاسایشی سنوور و دەروازە سنورییەکان دروست دەکەن کە بەرپرس دەبن لە پاراستنی خاڵە سنورییەکانی نێوان هەردوو وڵاتەکە.

جەختی لەوەش کردەوە، پەیوەندییەکانیان لەگەڵ عێراق فراوانتر دەکەن و داواشیان کردووە کە عێراق بۆ فراوانکردنی رۆڵی خۆی لە ناوچەکە هەوڵی زیاتر بدات و ئێرانیش هەماهەنگی تەواوەتی پرۆسەکە دەکات.

ئەوەش لە کاتێکدایە، سەرۆک کۆماری ئێران لەگەڵ شاندێکی وەزارەتەکانی ئابووریی و دەرەوەی ئێران گەیشتە بەغدا و لەلایەن سەرۆک وەزیرانی عێراقەوە پێشوازی لێکرا.

بە گوێرەی میدیاکانی ئێرانیش ، سەردانەکەی پزیشکیان تەواوکەری ئەو گرێبەستانە دەبێت کە ئیبراهیم رەئیسی سەرۆک کۆماری پێشووی ئێران لەگەڵ بەرپرسانی عێراق تاوتوێی کردبوو، جگە لەو تەوەرانەش هیچ گریبەستیکی دیکەی نوێ واژۆ ناکرێت.

لە میانەی کۆبوونەوەی هاوبەشی سەرۆک کۆماری ئێران و سەرۆک وەزیرانی عێراق لەلایەن وەزیرانی دەرەوەی عێراق و ئێران ١٤ یاداشتی واژۆکرا کە خۆیان دەبینیەوە لە ئابووری، هاوکاری راهێنان، گەنجان و وەرزش، کەلتوری، تەکنیکی، بیناسازی و پەروەردەیی، میدیا، پەیوەندییەکانی نێوان ئاسیا و ئەفریقا و ئەوروپا ، لە بواری گەشتیاری و ئایینییەکان، هاوکاری لە بواری ناوچە ئازادەکانی عێراقی - ئێرانی، کشتوکاڵ و سامانە سروشتییەکان و پاراستنی کۆمەڵایەتی، راهێنانی پیشەیی و تەکنیکی، پەرەپێدانی هێزی کار، و هاوکاری نێوان ژوورەکانی بازرگانی.