وەزارەتی پێشمەرگەی حکومەتی کاربەڕێکەر رایگەیاند، هاوکاری دارایی هاوپەیمانان بۆ مانگی هەشت گەیشتووە و سبەینێ دەست بە دابەشکردنی دەکرێت.
وەزارەتی پێشمەرگەی حکومەتی کاربەڕێکەری هەرێمی کوردستان رایگەیاند، هاوکاری هێزەکانی هاوپەیمانان بۆ هێزی پێشمەرگە خرایە سەر هەژماری بانکی وەزارەتی پێشمەرگە.
ئاماژەی بەوەشکردووە، بەڕێوەبەرایەتی گشتی بودجە و بەرنامەکان
(ژمێریاری سەربازی)، رێکارە دارایی و ژمێریارییەکانی ئەنجامداوە و سبەینێ
دووشەممە، دەست بە دابەشکردنی دەکرێت.
ئەوەش لە کاتێکدایە، لە ٣ی ئەم مانگەدا، بەهۆی بڕینی ئەو
هاوکارییەی هاوپەیمانان مانگانە بۆیان دەنێرێت و حکومەتی کاربەڕێکەر نایانداتێ، پێشمەرگەکانی
فەوجی ٣ی لیوای ١١ گردبوونەوە.
ئەو پێشمەرگانە باسیان لەوەکرد، ماوەی چوار مانگە ئەو
هاوکارییەیان پێنادرێت کە هاوپەیمانان بۆی دابین کردوون.
پێشتر هاوپەیمان چەندین کاروانى هاوکارى سەربازى و لۆجستییان
پێشکەش بە پێشمەرگە کردووە و لەساڵى ٢٠١٧ـەشەوە مانگانە زیاتر لە ٢٠ ملیۆن دۆلاریان
وەک مووچە دەدا بەو لیوا هاوبەشانەى خراونەتە سەر وەزارەتى پێشمەرگە.
لە مانگی ٦ی ئەمساڵیشەوە، ئەو پارەیە کرا بە هاوکاری
دارایی و مووچەکانیان چووەوە سەر بەغدا، بەڵام ئێستا حکومەتی کاربەڕێکەر نە هاوکارییەکەی
هاوپەیمانانیان بەسەر بەشێکیاندا دابەشدەکات و نەخۆشی مووچەیان پێدەدات، جگە لەوەی
بەشێکی زۆری ئەو پێشمەرگانە دەوامیان دوور لە شار و شوێنی نیشتەجێبوونیانە.
هەر بە هەمان هۆکار لە ٣ی مانگی ٧ی ئەمساڵیشدا پێشمەرگەکانی
لیوای ٩ی پیادە گردبوونەوە و ئاماژەیان بەوەدەکرد، نە مووچەیان پێدەدرێت نە هاوکاریی
هاوپەیمانان.