چاوگێک لە پۆلیسی سەڵاحەدین رایگەیاندووە، لە ئاهەنگێکی هاوسەرگیریدا لە قەزای بێجی سەر بە پارێزگای سەڵاحەدین، تەقەی هەڕەمەکی کراوە و بەهۆیەوە منداڵێکی تەمەن هەشت ساڵ بە سەختی بریندار بووە.

باسی لەوەشکردووە، ئەو منداڵە لەگەڵ خێزانەکەیدا لە ئاهەنگەکەدا بەشدار بووە و کاتێکیش کەسوکاری زاوا گەیشتوونەتە شوێنی ئاهەنگەکە دەستیان کردووە بە تەقەکردنێکی زۆر و بەهۆیەوە فیشەکێک بەر سەری منداڵەکە کەوتووە و تووشی خوێنبەربوون بووە.

ئەو چاوگە ئەوەشی خستەڕوو، راستەوخۆ منداڵەکە بۆ نەخۆشخانە گواستراوەتەوە و لەئێستاشدا دۆخی تەندروستی ناجێگیرە.

تەقەی هەڕەمەکی تائێستا بووەتە هۆکاری ناخۆشی بۆ چەندین کەس و خێزان، کە بەهۆیەوە یان ئەو کەسە گیانی لەدەستداوە یان تووشی ئیفلیجی و برینداری سەخت بووە.

لایەنە پەیوەندیدارەکان بەردەوام داوا لە هاوڵاتیان دەکەن بۆ دەربڕینی هەستی خۆشیان پەنا نەبەنە بەر تەقەکردن، چونکە نازانرێت ئەو فیشەکەی لە چەکەکەوە دەردەچێت لەکوێ و چۆن دەیداتەوە بە زەویدا، بەڵکو لەبری ئەوە چەندین رێگای دیکەی دەربڕینی خۆشی هەیە کە بەبێ زیانگەیاندن و هەراسانکردنی دەوروبەر دەکرێت ئەنجامبدرێت و لەبری گیروگرفت، ئاسودەیی بە کەسەکان دەبەخشێت.