PM:03:52:30/08/2024
860 جار خوێندراوەتەوە
ئاژانسێکى بوارى وزە رایگەیاند، عێراق توانیویەتی لە دوو ساڵدا توانای پاڵاوتنی نەوت بەڕێژەی ٣٠٪ زیاد بکات. بەرپرسانى عێراقیش دەڵێن، ساڵى داهاتوو پێداویستی ناوخۆ لە بەنزینی ئۆكتان بەرز دابین دەكەن.
ئاژانسى عێراق ئۆیل ریپۆرت راپۆرتێکی نوێی بڵاوکردەوە و تێدا هاتووە، کەرتی پاڵاوتگەکانی عێراق لە هەر ١٨ پاڵاوتگە سەرەکییەکە گەشەی کردووە و فراوان بووە، بە شێوەیەک بەراورد بە ساڵی ٢٠٢٢ پاڵاوتنی نەوت٣٠٪ زیادی کردووە.
لە راپۆرتەکەدا ئاماژە بەوەش کراوە، بەهۆی
سنووردارکردنی هەناردەی نەوتی عێراق لەلایەن ئۆپیکەوە و راگیرانی هەناردەی نەوت
لەڕێگەی بۆری نێوان هەرێمی کوردستان-تورکیاوە، فراوانبوونی بازاڕی ناوخۆیی عێراق
گرنگ و پێویستە.
ئەمەش
لە کاتێکدایە، پێشتر حسێن تاڵیب، بەڕێوەبەری كۆمپانیای بەرهەمە نەوتییەكان بە
ئاژانسی هەواڵی عێراقی راگەیاندبوو، عێراق گەیشتووەتە دابینكردنی پێداویستیەكانی
ناوخۆ لە بەرهەمەكانی زەیتی غاز و نەوتی سپی و لە ساڵی ٢٠٢٥ـدا، پێداویستی ناوخۆ لە
بەنزینی ئۆكتان بەرز دابین دەكات.
