وەزارەتی کۆچ و کۆچبەرانی عێراق رایگەیاند، ٣١١ ئاوارە لە کەپەکانی هەولێرەوە گەڕاونەتەوە بۆ ناوچەکانی خۆیان لە نەینەوا و ئەنبار.
ئەمڕۆ چوارشەممە، وەزارەتی کۆچ و کۆچبەرانی عێراق لە راگەیاندراوێکدا ئاماژەی بەوە کردووە، ٣١١ ئاوارەی کەمپی بەحرەکە لە هەولێر گەڕاونەتەوە بۆ پارێزگاکانی خۆیان لە نەینەوا و ئەنبار.
ئاماژەی بەوەش کردووە، بەشیکی زۆری ئاوارەکانی هەرێمی
کوردستان و بە تایبەتی هەولێر دەیانەوێت بەگەڕێنەوە بۆ ناوچەکانی خۆیان و وەزارەتیش
بە پێدانی هاوکاری دارایی و بنیادنانەوەی ناوچەکانیان بەردەوام دەبێت لە هاندانیان
بۆ گەڕانەوە.
هەفتەی رابردووش، وەزارەتی کۆچ
و کۆچبەرانی عێراق بڵاوی کردەوە، ٨٠٣ ئاوارە لە کەمپەکانی هەرشەم و بەحرکە لە
سنووری هەولێر گەڕانەوە ناوچەکانی خۆیان لە نەینەوا. دەشڵێت، سەرجەم ئەو ئاوارانەی
دەگەڕێنەوە ناوچەکانی خۆیان هاوکاری دارایی و مرۆییان پێ دەدرێت.
ئەوە لەکاتێکدایە، رۆژی ١١ـی مانگی رابردوو، وەزارەتی
کۆچ و کۆچبەرانی عێراق رایگەیاند، سەرجەم ئاوارەکانی نێو کەمپەکانی سنووری سلێمانی
گەڕاونەتەوە ناوچەکانی خۆیان و دواهەمین کەمپ لە ناوچەی عەربەت لە سنووری سلێمانی
داخراوە و هیچ کەمپێک لەسنووری سلێمانی بوونی نەماوە، بەڵام هێشتا چەند کەمپێکی
سنووری دهۆک و هەولێر ئاوارەیان تێدا نیشتەجێیە و کار بۆ گەڕانەوەی ئەو ئاوارانەش
دەکرێت.