وەزیری دارایی عێراق رایگەیاند، هەنگاوەکان بۆ چاکسازیکردن لە کەرتی بانکی بەردەوامە، بەوپێیەی متمانەی وەبەرهێنەرانی بیانی بە ئابووریی عێراق زیاتر بەزر دەکاتەوە و هۆکارە بۆ باشترکردنی کوالێتی ئەو خزمەتگوزارییە بانکییانەی کە پێشکەش بە هاوڵاتیان دەکرێت.
ئەمڕۆ سێشەممە، بە سەرپەرشتی تەیف سامی وەزیری دارایی عێراق کۆبوونەوەیەک لەبارەی رێکخستن و داڕشتنەوەی کەرتی بانکی بەتایبەت بانکەکانی رەشید و رافیدەین، لەگەڵ کۆمپانیای وردبینی نێودەوڵەتی ئێرنست ئەند یۆنگ بەڕێوەچوو.
لە کۆبوونەوەکەدا تەیف سامی وەزیری دارایی
عێراق جەختی لەوە کردەوە، رێکخستن و داڕشتنەوەی کارەکانی دامەزراوە داراییەکان گرنگە
چونکە یەکێکە لە رێگا سەرەکییەکانی راکێشانی وەبەرهێنەرانی بیانی و زیادبوونی
متمانەیان بە ئابووریی عێراق.
ئاماژەی بەوەش کرد، رێکخستن و داڕشتنەوەی
کارەکانی دامەزراوە داراییەکان یارمەتیدەریشە لە بەرەوپێشبردنی کوالێتی خزمەتگوزارییە
بانکییەکان کە متمانەی هاوڵاتیان بە سیستمی بانکی بەرزتر دەکاتەوە.
ئەوەشی خستە روو، ئامانجیان ئەوەیە بانکە
عێراقییەکان لە ئاستی نێودەوڵەتی و ناوخۆدا قبوڵکراو بن و خزمەتگوزاری زیاتر و
باشتر پێشکەش بە هاوڵاتیان بکەن، بۆ ئەو مەبەستەش بەردەوامن لە بەهێزکردنی توانای
دارایی بە هەمەچەشنکردنی سەرچاوەکانی داهات و زیادکردنی سەرمایەی ئابووری.