دەستەی دەروازە سنوورییەکانی عێراق رایگەیاند، لە ماوەی ١٨ رۆژدا، زیاتر لە سێ ملیۆن و ٣٠٠ هەزار زیارەتکار، بە مەبەستی بەشداریکردن لە چلەی ئیمام حسێن هاتوونەتە عێراق.
ئەمڕۆ شەممە، دەستەی دەروازە سنوورییەکانی عێراق راگەیەنراوێکی بڵاو کردووەتەوە و تێیدا هاتووە، لە رۆژی ٦ـی ئەم مانگەوە تا ٢٣ـی ئەم مانگە، سێ ملیۆن و ٣٦٧ هەزار و ٤٤٩ کەس لە دەروازە سنوورییەکانەوە هاتوونەتە عێراق.
ئاماژە بەوەش کراوە، ئەو زیارەتکارانە لە
دەروازە سنوورییەکانی، سەفوان، شەلامجە، شیب، زەرباتیە، مەنزوریە، قائیم،
فڕۆکەخانەی بەغدا، فڕۆکەخانەی نەجەف لە سنووری عێراق و دەروازەکانی حاجی ئۆمەران و
باشماغ لە هەرێمی کوردستانەوە هاتوونەتە عێراق.
ئەوەش خراوەتە روو، ژمارەی ئەو کەسانەی کە لە
رێگەی ئەو دەروازانەوە عێراقیان بەجێ هێشتووە، دوو ملیۆن و ٢٢١ هەزار و ٧٠ کەس
بوون.
ئەوەش لەکاتێکدایە، سبەی یەکشەممە، رێوڕەسمی
چلەی ئیمام حسێن لە عێراق بەڕێوە دەچێت و پێشبینیش دەکرێت هاوشێوەی ساڵانی رابردوو،
ملیۆنان کەس بەشداری لە رێوڕەسمەکەدا بکەن.