ئەنجومەنی خزمەتگوزاریی گشتیی عێراق رایگەیاند، بڕیاریاندا بە دامەزراندنی ٢٥٠ دەرچووی هەڵگری بڕوانامەی دبلۆم و ٩٠ کەسی خاوەن بڕوانامەی دکتۆرا و ماستەر لە بوارە جیاجیاکاندا.
ئەمڕۆ پێنجشەممە، ئەنجومەنی خزمەتگوزاریی گشتیی عێراق رایگەیاند، سەبارەت بە دامەزراندنی دەرچوانی زانکۆ و پەیمانگاکان و هەڵگرانی بڕوانامەی باڵا کۆبوونەوەیەکیان ئەنجامدا.
ئاماژەی بەوەش کرد، لەکۆبوونەوەکەدا بڕیاریاندا بە دامەزراندنی زیاتر لە
٢٥٠ دەرچووی هەڵگری بڕوانامەی دبلۆم لە وەزارەت و دەستە و پارێزگاکان.
ئەوەشی خستە روو، سەبارەت بە هەڵگرانی بڕوانامەی باڵا، بڕیاریاندا بە دامەزراندنی
٩٠ کەسی هەڵگری بڕوانامەی دکتۆرا و ماستەر لە بوارە جیاجیاکاندا.
لەماوەی زیاتر لە مانگێكدا ئەنجومەنی خزمەتگوزاریی عێراق بڕیاریداوە بە دامەزراندنی
زیاتر لە ١١ هەزار و ٧٨٠ کەسی خاوەن بڕوانامەی باڵا و دەرچووە یەکەمەکانی زانکۆ و
پەیمانگاکان.
ئەوەش لەکاتێکدایە، نزیکەی ١٠ ساڵە لە هەرێم بە هەموو جۆرێک دامەزراندن راگیراوە
و چەندان جار دەرچوانی زانکۆ و یەکەمەکان هاتوونەتە سەر شەقام بۆداواکردنی مافی خۆیان
بەڵام جگە لە وەڵامێکی سارد و بەڵێنێکی بێ ئەنجام حکومەتی کاربەڕێکەر و دەسەڵاتدارانی
هەرێم هیچیان بۆ دەرچوانی دانەمەزراو پێ نییە.