پەرلەمانى ئێران متمانەى بە کابینە وزارییەکەى مەسعود پزیشکیانی سەرۆک کۆمارى ئەو وڵاتە دا کە لە ١٩ وەزیر پێکهاتوون و عەباس عێراقچى بوو بە وەزیرى دەرەوە.
میدیاى فەرمى ئێران بڵاوی کردەوە، ئەمڕۆ چوارشەممە، پەرلەمانى ئێران لە کۆبوونەوەیەکى تایبەتدا، متمانەى داوە بە سەرجەم وەزیرەکانى کابینەکەى مەسعود پزیشکیان کە لە ١٩ وەزیر پێکهاتووە.
ئەوەش بۆ یەکەمجارە لە ماوەى دوو دەیەى رابردوودا سەرجەم ئەندامانى
کابینەى حکومەت پێکەوە لە پەرلەمان متمانەیان پێبدرێت و کاندیدى هیچ یەکێک لە وەزارەتەکان
رەت نەکرێتەوە.
یەکێک لەو وەزیرانەى کە لە پەرلەمان متمانەى پێدرا، عەباس عێراقچى تەمەن
٦١ ساڵ بوو بۆ پۆستى وەزیرى دەرەوە.
عێراقچى یەکێک بووە لە ئەندامانى تیمى دانوستانکارى ئێران لە رێکەوتنى
ئەتۆمى نێوان ئێران و وڵاتانى پێنج کۆ یەک لە ساڵى ٢٠١٥ کە بەهۆیەوە بەشێکى زۆر لە
سزاکان لەسەر تاران هەڵگیران لە بەرامبەر دانانى کۆمەڵیک کۆت و بەند لەسەر بەرنامە
ئەتۆمییەکەى ئێران کە دواتر و ساڵى ٢٠١٨ بەهۆى کشانەوەى دۆناڵد ترەمپ، رێکەوتنەکە
هەڵوەشایەوە.
لە کاتى بانگەشەى هەڵبژاردنی سەرۆکایەتى ئێرانیشدا مەسعود پزیشکیان بەڵێنیدا
رێکەوتنە ئەتۆمییەکە زیندوو بکاتەوە.