جەلیل خەزعەل بەڕێوەبەری یانەی ئەدەب لە یەکێتی نووسەرانی عێراق باسی لەوەکردووە، گۆڤاری منداڵان بەهۆی ئەو چیرۆک و گێرانەوانەی کە لەناویدایە، هەروەها ئەو چالاکییانەی منداڵ لەناو گۆڤارەکەدا ئەنجامی دەدات، رۆڵێکی گەورە دەگێڕێت لە پەروەردەکردنی منداڵ و بەرەوپێشبردنی بەهرەکانیدا.

مونزر عەبدولحر شاعیر و بەڕێوەبەری دانیشتنەکەش ئاماژەی بەوەکرد، بواری منداڵان پێویستی بە توانا و بەهرەی گەورە هەیە، چونکە پێویستە ئەو جۆری چیرۆک و وشانەی بەکاریدەهێنیت هەڵبژاردە بن و رۆڵ بگێڕن لە بەرەوپێشبردنی منداڵەکەدا،بۆیە ئەو دانیشتە رێکخراوە کە بتوانن باشترین هەڵبژێرن.

لەلایەکی دیکەوە حەنون مەجید چیرۆکنووسی عێراقی رایگەیاند، "ئەدەبی منداڵان لە گرنگترین ئەدەبەکانە، چونکە مامەڵە لەگەڵ کەسانێکدا دەکەیت کە تایبەتمەندی و رەنگ و خواستی خۆی هەیە، ئەو گفتوگۆیەش بۆ دۆخی ئێستا گرنگە کە کەرستەکانی بەردەستی منداڵ زیاترن، پێویستە ئێمە خۆمان بەجۆرێک بگونجێنن کە لەگەڵ سەردەمی ئێستادا یەکبگرینەوە".

منداڵان نەوەی داهاتووی هەر کۆمەڵگەیەکن، ئەوان رۆژێک دێت دەبنە گەنج و دەستی کار، دەبنە خێزان و مامۆستا، ئەرکە جیاوازەکانی کۆمەڵگە لەئەستۆ دەگرن، بۆیە پەروەردەی دروست و تەندروستی جەستەیی و دەروونی منداڵ گرنگییەکی بەرچاوی هەیە. پێویستە منداڵان لە ژینگەیەکی وادا پەروەردەبن و گەورە ببن کە لەداهاتوودا بتوانن سوود بە خۆیان و چواردەوریان بگەیەنن.

یەکێک لەو بوارانەی رۆڵێکی بەرچاو دەگێڕێت لەو پڕۆسەیەدا بواری ئەدەبی منداڵانە، کە خۆی دەبینێتەوە لە چیرۆک و هۆنراوە و وێنەی پەروەردەیی، چالاکی هزری، کە ئەوەش لە رێگای پەرتوکە چیرۆکییەکان و گۆڤارەکان، یاخود خولە هاوینەییەکانەوە دەکرێت منداڵان بەریبکەون و ئەزموونی بکەن.
هـ.ئـ