ئاماژەی بەوەش کرد، هەوڵدەدرێت بۆ ماوەیەکی دیاریکراو کە زیاتر بێت لە دوو هەفتە ئاگربەست رابگەیەندرێت، چونکە دەبێت دیلەکان ئاڵوگۆڕیان پێبکرێت و لەوە زیاتر لە مەترسیدا نەبن.

باسی لەوەش کرد، ئەم ئاگربەستە تەنها لەپێناو دیلە ئیسرائیلییەکانە. وتیشی، " دەمانەوێت سەقامگیری بۆ ناوچەکە بگەڕێنینەوە و لەوە زیاتر مەترسی لەسەر ژیانی ئیسرائیلییەکان نەبێت".

لە بەرامبەریشدا وتەبێژی بزوتنەوەی حەماس بە ئاژانسی هەواڵی سکای نیوزی راگەیاند، ئەوان دەمێکە هەوڵی ئەنجامدانی ئاگربەست دەدەن بەڵام لایەنی بەرامبەر ئامادە نەدەبوو. وتیشی، " دەمانەوێت لەرێگای ئەم ئاگربەستەوە هەنگاو بنێین بۆ کۆتایی هێنان بە گرژی و ئاڵۆزییەکان".

هاوکات، سەما عەبدول و یاسەمین فەیوم کە نوێنەری چەند کەمپێکی غەززەن لەو بارەیەوە بە دیجیتاڵ میدیای ئێن ئاڕ تیان راگەیاند، " خەڵکی ناوچەکە بەهۆی دەنگی مووشەک و گوللـەکانەوە لە دۆخێکی قورسی ژیان و دەروونیدان و هیچ خۆراکێکی پێویستیش لەبەردەستدا نییە، هەربۆیە پێویستە بە زووترین کات ئاگربەست بکرێت و ناردنی هاوکارییەکان زیاتر و خێراتر بکرێت".

ئەوەش لەکاتێکدایە، جەنگی نێوان حەماس و ئیسرائیل لە رۆژی ٧ـی تشرینی یەکەمی ساڵی رابردووەوە سەری هەڵداوە و ماوەی زیاتر لە هەشت مانگە جەنگەکە بەردەوامە، بەهۆیەوە هەزاران کەس لە هەردوولا گیانیان لەدەستداوە و بە هەزارانی دیکەش بریندار بوون.