وەزارەتی تەندروستیی فەڵەستین رایگەیاند، دوای تێپەڕینی ٢٦٥ رۆژ بەسەر دروستبوونی جەنگی غەززە، ژمارەی گیانلەدەستدان گەیشتووەتە ٣٧ هەزار و ٧٦٥. هاوکات، سوپای ئیسڕائیل ئاماژەی بەوە کرد، لە سەرەتای جەنگەکەوە تا ئێستا ٦٦٧ سەرباز و ئەفسەری سوپای ئیسڕائیل گیانیان لەدەستداوە.
ئەمڕۆ پێنجشەممە، وەزارەتی تەندروستیی فەڵەستین رایگەیاند، لە ماوەی ٢٤ کاتژمێری رابردوودا بەهۆی هێرش و بۆردوومانەکانی ئیسڕائیلەوە لە کەرتی غەززە ٤٧ کەس گیانیان لەدەستداوە و ٥٢ کەسیش بریندار بوون.
ئاماژەی
بەوەش کرد، دوای تێپەڕینی ٢٦٥ رۆژ بەسەر دروستبوونی جەنگی غەززە، ژمارەی قوربانییەکان
لە کەرتی غەززە گەیشتووەتە ٣٧ هەزار و ٧٦٥ گیانلەدەستدان و ٨٦ هەزار و ٤٢٩ بریندار.
هاوکات،
ئەمڕۆ لە ئەنجامی تەقینەوەی دوو بۆمب لەکاتی هێرشێکی ئیسڕائیل بۆ سەر شاری جینین لە
رۆژئاوای کەرتی غەززە سەربازێکی ئیسڕائیل گیانی لەدەستدا و ١٧ سەربازی دیکەش بریندار
بوون.
لای خۆشیەوە
سوپای ئیسڕائیل رایگەیاند، لە رۆژی ٧ـی تشرینی یەکەمی ساڵی رابردووەوە کە دەکاتە سەرەتای
جەنگی غەززە تاوەکو ئێستا، ٦٦٧ سەرباز و ئەفسەری سوپای ئیسڕائیل گیانیان لەدەستداوە
و سێ هەزار و ٩٤٤ سەرباز و ئەفسەری دیکەش بریندار بوون.
ئەوەش لەکاتێکدایە،
جەنگی نێوان حەماس و ئیسرائیل لە رۆژی ٧ـی تشرینی یەکەمی ساڵی رابردووەوە سەری هەڵداوە
و ماوەی زیاتر لە هەشت مانگە جەنگەکە بەردەوامە.