وەزیری تەندروستیی سعودیە رایگەیاند، لە وەرزی حەجی ئەمساڵدا زیاتر لە هەزار و ٣٠٠ حاجی لەکاتی ئەنجامدانی رێوڕەسمی حەج گیانیان لەدەستداوە.
ئەمڕۆ دووشەممە، فەهد جەلاجل وەزیری تەندروستیی سعودیە رایگەیاند، لەمساڵدا ژمارەیەکی زۆر حاجییان بەهۆی گەرماوە دۆخی تەندروستیان تێکچووە و رەوانەی نەخۆشخانەکان کراون، هەندێکیان تا ئێستاش چارەسەر وەردەگرن.
ئاماژەی بەوەش کردووە، ژمارەی ئەو حاجییانەی لەمساڵدا لەکاتی بەجێهێنانی فەریزەی حەج گیانیان لەدەستداوە گەیشتووەتە هەزار و ٣٠١ حاجی.
باسی لەوەش کردووە،
٨٣٪ـی ئەو حاجییانەی گیانیان لەدەستداوە مۆڵەتی حەجییان وەرنەگرتووە هەربۆیە بۆ ماوەیەکی درێژ لەژێر تیشکی خۆردا بەپێ
رۆیشتوون، لەنێویشیاندا کەسانی بەساڵاچوو و توشبووانی نەخۆشییە درێژخایەنەکان هەبوون.
ئەوەشی خستووەتە روو، هەوڵە
هاوبەشەکانی کەرتی تەندروستی و هێزە ئەمنییەکانی حەج سەرکەوتنی بەدەست هێناوە و هیچ
پەتا و نەخۆشییەکی بەربڵاو تۆمار نەکراوە لە وەرزی حەجی ئەمساڵدا.
وەزیری تەندروستیی سعودیە
وتیشی، لەدوای گەیشتنیان لە دەروازە سنوورییە ئاسمانی و دەریایی و وشکانییەوە، یەک
ملیۆن و ٣٠٠ هەزار خزمەتگوزاری خۆپارێزی پێشکەش بە حاجییان کراوە لەوانەش کوتان و
چاودێری پزیشکی و چەند خزمەتگوزارییەکی دیکەش، هاوکات لایەنە پەیوەندیدارەکان
بەردەوام بوون لە پێدانی هۆشداری بە حاجییان و کەسانی دیکە لە مەترسییەکانی بەرکەوتن
بە فشاری گەرما لەڕێگەی پابەندبوون و جێبەجێکردنی رێکارەکانی خۆپارێزی.
ئەوەش لەکاتێکدایە، بە گوێرەی ئاماری وەزارەتی حەجی سعودیە، یەک ملیۆن
و ٨٣٣ هەزار و ١٦٤ حاجی، فەریزەی حەجی ئەمساڵیان ئەنجام داوە، کە ٣٣ هەزار و ٦٩٠
حاجی خەڵکی عێراقن و لەو ژمارەیەش چوار هەزار و ٦٨٥ یان نیشتەجێی هەرێمی
کوردستانن.