ئاماژە بەوەش کراوە، لەگەڵ بەرزبوونەوەی ژمارەی گیانلەدەستدان، ژمارەی ئەو کەسانەی بەهۆی بەردەوامی جەنگەکەوە برینداربوون بۆ ٨٠ هەزار و ٤٢٠ کەس بەرزبووەتەوە.

باس لەوەش کراوە، لە ماوەی ٢٤ کاتژمێری رابردوودا، لە ئەنجامی بەردەوامی هێرشەکانی ئیسرائیل ٤٦ کەس گیانیان لەدەستداوە و ١٣٠ کەسیش بریندار بوون.

ئەوەش خراوەتە روو، هێشتا ژمارەیەکی زۆر لە تەرمی قوربانییەکان لەژێر داروپەردووی باڵەخانە رووخاوەکاندا ماون و دەرنەهێندراونەتەوە.

پێشتریش، نوسینگەی میدیای حکومەتی فەڵەستین لە غەززە رایگەیاند، لە ئاکامی هێرشەکانی ئیسرائیلدا لە ٧ـی ئۆکتۆبەری ساڵی رابردووەوە تا ئێستا، ١٨٩ باڵەخانەی حکومی، ١٠٨ قوتابخانە و زانکۆ و ٦٠٤ مزگەوت بە تەواوی ڕووخاون، جگە لەوەی کە ٣١٣ قوتابخانە و زانکۆی دیکە و ٢٠٠ مزگەوت بەشێکیان رووخاوە.

هاوکات، دادگای دادی نێودەوڵەتی رایگەیاند، هێرشی سەربازیی رەفەح بە پێشهاتێکی مەترسیدار دەزانن و دەبێت ئیسڕائیل سەرجەم هێرشەکانی لە ناوچەی رەفەح لە باشووری کەرتی غەززە رابگرێت و دەروازەی رەفەح بەڕووی گەیشتنی هاوکارییە مرۆییەکان بکاتەوە.

لەو بارەیەوەشەوە، چەندین بەرپرسی باڵای ئیسڕائیل رایانگەیاند، ئیسڕائیل بە بڕیارەکەی دادگای دادی نێودەوڵەتی رازی نابێت و بەردەوام دەبێت لە هێرشەکان بۆ سەر رەفەح تاوەکو بەتەواوی حەماس لەناو دەبەن.