وەزارەتی تەندروستی فەڵەستین رایگەیاند، بەهۆی بۆردومان و هێرشەکانی ئیسڕائیل بۆ سەر کەرتی غەززە تاوەکو ئێستا ٣٤ هەزار و ٣٨٨ کەس گیانیان لەدەستداوە و ٧٧ هەزار و ٤٣٧ کەسیش بریندار بوون. دەشڵێت، لە ماوەی ٢٤ کاتژمێری رابردوودا ٣٢ کەس گیانیان لەدەستداوە و ٦٩ کەسیش بریندار بوون.
ئەمڕۆ شەممە، وەزارەتی تەندروستی فەڵەستین رایگەیاند، لە ماوەی ٢٤ کاتژمێری رابردوودا بەهۆی بۆردومان و هێرشەکانی ئیسڕائیل بۆ سەر کەرتی غەززە ٣٢ کەس گیانیان لەدەستداوە و ٦٩ کەسیش بریندار بوون.
ئاماژەی بەوەش کرد، لە سەرەتای دروستبوونی جەنگی نێوان حەماس
و ئیسڕائیل لە رۆژی ٧ـی تشرینی یەکەمی ساڵی رابردووەوە تاوەکو ئێستا لە کەرتی غەززە
٣٤ هەزار و ٣٨٨ کەس گیانیان لەدەستداوە و ٧٧ هەزار و ٤٣٧ کەسیش بریندار بوون.
ئەوەشی خستە روو، لەناو ئەو کەسانەی گیانیان لەدەستداوە
زیاتر لە ١٤ هەزار و ٥٠٠ کەسیان منداڵن و زیاتر لە هەشت هەزار و ٤٠٠ کەسیشیان ژنن،
هەروەها زیاتر لە هەشت هەزار کەسیش بێسەروشوێنن.
هاوکات بەپێی ئامارەکانی نووسینگەی هەماهەنگی کاروباری
مرۆیی نەتەوە یەکگرتووەکان، زیاتر لە نیوەی ماڵ و خانووەکانی غەززە خاپوور بوون و
زیانیان پێگەیشتووە و لە کۆی ٣٥ نەخۆشخانە تەنها ١١ نەخۆشخانەیان کار دەکەن.
لە رۆژی ٧ـی تشرینی یەکەمی ساڵی رابردوودا چەکدارانی حەماس
هەزاران مووشەکیان ئاڕاستەی ئیسڕائیل کرد و لەبەرامبەریشدا ئیسڕائیل دەستی بە هێرشکردن
بۆ سەر کەرتی غەززە کرد و بەهۆی هێرشەکانەوە هەزاران کەسی مەدەنی گیانیان لەدەستداوە
و زیاتر لە ملیۆنێک کەسیش ئاوارەی ناوچەی رەفەح لە باکوری کەرتی غەززە بوون و لە ئێستادا
ئیسرائیل لە پلانیدایە هێرش بۆ سەر ناوچەی رەفەح دەست پێ بکات.