بەشێک لە خاوەن کێڵگە پەلەوەرییەکانی عێراق و هەرێم، دژی هاوردەکردنی هێلکەی قاچاغ لە مەرزەکانەوە گردبوونەوە. دەشڵێن، "بەهۆی هاوردەکردنی هێلکەی قاچاغەوە زیانێکی زۆرمان بەر کەوتووە".
ئەمڕۆ پێنجشەممە، بەشێک لە خاوەن کێڵگە پەلەوەرییەکانی عێراق و هەرێم گردبوونەوە و داوا دەکەن هاوردەکردنی هێلکەی قاچاغ لە مەرزەکانەوە رابگیرێت.
خاوەن کێڵگەکان باس لەوە دەکەن، بە پێی نوسراوی حکومەتی عێراق و حکومەتی
کاربەڕێکەر هاوردەکردنی هێلکەی قاچاغ قەدەغەیە، بەڵام کار بەو نوسراوانە ناکرێت.
ئەوەشیان خستە روو، نزیکەی هەفتەیەکە هیچ
خاوەن پڕۆژەیەک نەیتوانیوە هێلکە بفرۆشێت بەهۆی هێلکەی قاچاغەوە. دەشڵێن، "بەهۆی
هێلکەی قاچاغەوە زەرەر و زیانێکی زۆرمان بەر کەوتووە".
هاوکات، چەند خاوەن کێڵگەیەک بە ئێن ئاڕ
تییان راگەیاند، لە مەرزەکانەوە بارێک هێلکەی قاچاغ بە چوار هەزار و ٥٠٠ دۆلار
داخڵی هەرێم و عێراق دەکرێت و لەوێشەوە دەبرێتە بازاڕەکان.
وتیشیان، داوایان لە وەزیری کشتوکاڵی حکومەتی
کاربەڕێکەری هەرێم کردووە کێشەکەیان بۆ چارەسەر بکات و هاوردەکردنی هێلکەی قاچاغ
قەدەغە بکات، بەڵام پێی وتون، "بە نوسراوی فەرمی هاوردەکردنی هێلکەی قاچاغ
قەدەغە کراوە بەڵام کار بە بڕیارەکەی من ناکرێت".