وتیشی، لەکۆی ٧٧٦ کیلۆمەتر دووجا رووبەری پیس بە مین و تەقەمەنی لە هەرێم، ٥٢٠ کیلۆمەتر دووجای پاککراوەتەوە. ئاماژەی بەوەش کرد، ئەو کێڵگە مینیانەی ماون، لە شوێنی سەخت و بەرز و ناوچەی سنوورین و تێچووی زۆریان پێویستە بۆ پاککردنەوە.

ئەوەشی خستە روو، زیاتر لە ٣٦ جۆری مینی چێنراو لە هەرێمدا هەن، کە لە رابردوودا وڵاتانی ئەوروپا و ئەمریکا و چین و ئیسرائیل مینیان بە حکومەتی ئەوکاتی عێراق فرۆشتووە و جگە لەوانەش هەریەک لە ئێران و عێراقیش مینیان لە ناوچەکانی سەر بە هەرێم چاندووە.

جێگری سەرۆکی دەزگای مین باسی لەوەش کرد، بە ریزبەندی ئەو ناوچانەی کە رێژەی مینیان زۆرە بەم جۆرەن: "شارباژێڕ، پێنجوێن، سۆران، چۆمان، خانەقین، دەربەندیخان، پشدەر، ئامێدی و زاخۆ".

داواش لە هاوڵاتییان دەکات، خۆیان بپارێزن لەو ناوچانەی کە گوماناوین و پابەندی رێنماییەکانی دەزگای گشتی کاروباری مین بن.

ئەوەش لە کاتێکدایە، زۆری رێژەی رووبەری مینی چێنراو لە هەرێم و بەتایبەت ناوچە سنوورییەکان، دەگەڕێتەوە بۆ ماوەی شەڕی هەشت ساڵەی نێوان عێراق و ئێران، کە بەهۆیەوە لەو ساڵانەدا چەندین ناوچەی هەرێم مینڕێژ کران و تاوەکو ئێستاش بە تەواوەتی نەتوانراوە پاکبکرێنەوە و ساڵانەش چەندین رووداوی بەرکەوتن بە مینی لێدەکەوێتەوە، کە دەبنە هۆی گیانلەدەستدان یان کەمئەندامبوونی کەسی بەرکەوتوو. زۆرجاریش ئاژەڵانی هاوڵاتییانی دانیشتووی ئەو ناوچانە، مینیان پێدا دەتەقێتەوە.