دوای رەخنەی ئێران لە بڕیارەکەی دوێنێی ئەنجومەنی پارێزگارانی ئاژانسی وزەی ئەتۆم، وەزیری دەرەوەی ئێران، هەڵوەشاندنەوەی رێککەوتنەکەی نێوان خۆی و رافایل گرۆسی راگەیاند کە ١٠ـی ئەیلول لە قاهیرە واژۆکرا.
ئەمڕۆ هەینی ٢١ـی تشرینی دووەمی ٢٠٢٥، عەباس عێراقچی، وەزیری دەرەوەی ئێران وتی، رێککەوتنی قاهیرە بەهۆی هەڵوێستی ئەمریکا و ئەوروپا کۆتایی هات و دەڵێت، ئەوان بەدوای درووستکردنی قەیرانێکی نوێدا نین بەڵام لایەنەکانی تر قەدری نیازپاکییان نازانن.
هاوکات، وەزارەتی دەرەوەی ئێران بڕیاری
دەستەی بەڕێوبەری ئاژانسی نێودەوڵەتی وزەی ئەتۆم کە لە لایەن ئەمریکا، ئەڵمانیا،
فەڕەنسا و بەریتانیا پەسەندکرابوو بە نایاسایی و ناڕەوا زانی.
ئەمە دوای ئەوە هات کە ئاژانسی وزەی
ئەتۆمی داوا لە ئێران دەکات، زانیاریی درووست بدەن بە پشکنەرانی ئاژانسەکە سەبارەت
بە رێژەی کۆکردنەوەی یۆرانیۆمی پیتێنراو و رێگە بدەن بچنە ناو شوێنە
ئەتۆمییەکانیان.
تاران لە دوای شەڕی ئەم دواییەی مانگی
حوزەیرانی ساڵی رابردوو پەیوەندییەکانی لەگەڵ ئاژانسی وزەی ئەتۆمی پچڕاند، بەڵام لە
١٠ـی ئەیلولدا لەگەڵ ئاژانسەکە گەیشتنە رێککەوتن و لە قاهیرە واژۆکرا.
ئاژانسی وزەی ئەتۆم دەڵێت، بەپێی پێشبینییەکان، ئێران خاوەنی زیاتر لە ٤٤٠ کیلۆگرام
یۆرانیۆم بووە کە پیتێنراوە و نزیکە لەو ئاستەی کە پێویستە بۆ درووستکردنی چەکی
ئەتۆمی.