هاوکات، بەپێی ڕاپۆرتێکی ڕۆژنامەی نیویۆرک تایمز، کامالا هاریسی کاندیدی دیموکراتەکان لە ویلایەتە خۆڵەمێشییەکان کە هەریەکە لە ویلایەتەکانی پێنسەلڤینیا، ئۆریگۆن، جۆرجینیا، ویسکۆنسن، ئەریزۆنا، کارۆلاینای باکور و نیڤادا بە ڕێژەیەکی کەم لە پێش دۆناڵد ترەمپەوەیە، بە جۆرێک، کامالا هاریس ٤٧.٧٪ـی دەنگەکان و دۆناڵد ترەمپ ٤٧.١٪ـی دەنگەکانیان بەدەست هێناوە.

دۆناڵد ترەمپ ئاماژەی بەوە کرد ئەگەر لە هەڵبژاردنەکەدا شکست بهێنێت، ئەوا ئەنجامەکان قبوڵ دەکات، لە بەرامبەریشدا کامالا هاریس وتی" بە گەشبینییەوە چاوەڕوانی ئەنجامەکان دەکەم".

لەلایەکی دیکەشەوە، میدیاکانی ئەمریکا بڵاویان کردووەتەوە، تا ئێستا نزیکەی ٩٠ ملیۆن کەس بەشدارییان لە هەڵبژاردنەکەدا کردووە و دەنگیان داوە، چوونی هاوڵاتیانی وڵاتەکەش بۆ سەر سندووقەکانی دەنگدان بەردەوامە.

لای خۆشییەوە باراک ئۆباما، سەرۆکی پێشوتری ئەمریکا لە پەیامێکی ڤیدیۆییدا لە پێگەی فەرمی خۆی لە تۆڕی کۆمەڵایەتی ئێکس ئاماژەی بەوە کرد، داوا دەکات هاوڵاتیانی وڵاتەکەی لەماڵەکانیان نەمێننەوە و بچن دەنگی خۆیان بەکاربهێنن و سەرۆکی چوارساڵی داهاتووی خۆیان دیاری بکەن.