١٠ وڵاتی رۆژئاوا رایانگەیاند، بەهۆی شەڕی ناوخۆی سودانەوە سودانییەکان رووبەڕووی برسێتی بوونەتەوە و پێویستیان بە هاوکاری بەپەلە هەیە. بەپێی دواین ئاماریش ٢٦ ملیۆن سودانی رووبەڕووی برسێتی بوونەتەوە.
ئەمڕۆ شەممە، ١٠ وڵاتی رۆژئاوا کە لەنیویاندا ئەمریکا و بەریتانیا و فەرەنسا و ئەڵمانیا هەیە راگەیاندراوێکی هاوبەشیان لەبارەی دۆخی سودانەوە بڵاوکردەوە.
لە راگەیەندراوەکەدا ئاماژە بەوە کراوە، هەردوو
لایەنی بەشدار لە شەڕ ناوخۆی سودان کە سوپای وڵاتەکە و هێزی پشتیوانی خێران رێگری
لە هاوکارییە مرۆییەکان دەکەن بۆ سودانییەکان.
ئەوەش خراوەتە روو، داوا دەکەن بەزووترین
کات ئاسانکاری بکرێت بۆ ناردنی هاوکارییە مرۆییەکان بەبێ هیچ مەرجێکیش کۆتایی بە
رێگرییەکان بهێندرێت و رێز لە یاسای مرۆیی نێودەوڵەتی بگرن.
لە ١٥ـی نیسانی ٢٠٢٣ـەوە سوپای سودان و هێزی
پشتیوانی وڵاتەکە لە جەنگی ناوخۆدان بەهۆی بڕیارێکی عەبدولفەتاح بورهان سەرۆکی
سوپای سودان بۆ لکاندنی هێزەکانی پشتیوانی خێرا بە سوپای وڵاتەوە و کردنیان بە
هێزێکی رەسمی لە چوارچێوەی دەوڵەتدا.
دوای ئەو بڕیارە محەمەد حەمدان دەلقو سەرۆکی
هێزەکانی پشتیوانی خێرا بڕیارەکەی رەتکردەوە و کودەتای بەسەر سوپادا کرد و جەنگێکی
خوێناوی ناوخۆ لە سودان دەستی پێکرد کە بەهۆیەوە تا ئیستا ١١ ملیۆن و ٣٠٠ هەزار
سودانی ئاوارە بوون و ٢٦ ملیۆن سودانیش رووبەڕووی خراپی خۆراک و ئاو بوونەتەوە.