وەزارەتی کۆچ و کۆچبەرانی عێراق رایگەیاند، ٢٣٥ خێزانی ئاوارە لە کەمپەکانی هەرێمەوە گەڕاونەتەوە ناوچەکانیان. دەشڵێت، بڕی چوار ملیۆن دینار دراوەتە ئەو خێزانانە.
وەزارەتی کۆچ و کۆچبەرانی عێراق رایگەیاند، ٢٣٥ خێزانی ئاوارە لە کەمپەکانی هەرێمەوە گەڕاونەتەوە ناوچەکانیان لە شەنگال و نەینەوا.
ئەوەشی خستووەتە روو، بڕی چوار ملیۆن دینار
وەک هاوکاری و هاندان دراوەتە ئەو خێزانانە و هەر خێزانێکیش بگەڕێتەوە ناوچەکەی خۆی
ئەو هاوکارییەی پێ دەدرێت.
یەکشەممەی رابردووش، وەزارەتی کۆچ و کۆچبەرانی عێراق بڵاوی کردەوە، ١٦٤ ئاوارە لە کەمپی بەحرکە
لە سنووری هەولێرەوە گەڕانەوە ناوچەکانی خۆیان لە سەڵاحەدین و نەینەوا.
ئەوە لەکاتێکدایە، رۆژی ١١ـی تەمموز، وەزارەتی کۆچ و کۆچبەرانی عێراق رایگەیاند،
سەرجەم ئاوارەکانی نێو کەمپەکانی سنووری سلێمانی گەڕاونەتەوە ناوچەکانی خۆیان و
دواهەمین کەمپ لە ناوچەی عەربەت لە سنووری سلێمانی داخراوە و هیچ کەمپێک لەسنووری
سلێمانی بوونی نەماوە، بەڵام هێشتا چەند کەمپێکی سنووری دهۆک و هەولێر ئاوارەیان تێدا
نیشتەجێیە و کار بۆ گەڕانەوەی ئەو ئاوارانەش دەکرێت.