ئاماژەی بەوەش کرد، کەمبوونەوەی رووداوەکانی ئاگرکەوتنەوە بەشێوەیەکی بەرچاو بۆ رێکارەکانی وەزارەتی ناوخۆ دەگەڕێتەوە، کە یەکێک لەوانە دابینکردنی ئۆتۆمبێلی نوێی ئاگرکوژێنەوە و کردنەوەی ١٠٠ ناوەندی دیکەی ئاگرکوژینەوەی گەورە و بچووک بوون لە پارێزگاکانی عێراق.

باسی لەوەش کرد، ساڵی رابردوو زیاتر لە ١٦ هەزار رووداوی ئاگرکەوتنەوە تا مانگی ئەیلوول تۆمارکرابوو، کە ئەوەش ببووە هۆی ئەوەی سیستمی ئاگرکوژێنەوە و چاودێری لە باڵەخانە و میوانخانەکاندا تۆکمەتر بکەن و رێکارەکانیان توندتر بکەنەوە.

ئەوەشی خستە روو، لە ئێستادا هەماهەنگی هەیە لەگەڵ وڵاتانی دراوسێ کە لەسەر ٢٧ رووبەری جیاوازی زەوی لە ناوچە جیاوازەکانی عێراق ناوەندی راهێنان و دابینکردنی ئامێری ئاگرکوژینەوە بۆ سەرجەم میوانخانەکان و هاوڵاتیان دابینبکرێت. وتیشی، "ئەم ناوەندە لەسەر ئەرکی هاوپەیمانانە و هەماهەنگ دەبن لە دروستکردن و بەرەوپێشبردنی یەکەی بەرگری و فریاکەوتنی عێراق".

ئەوەش لە کاتێکدایە، بەگوێرەی راپۆرتێکی میدیا عەرەبییەکان لەماوەی ساڵانی ٢٠٢٠ تا مانگی ئەیلوولی ٢٠٢٤ لە ناوچە جیاوازەکانی عێراق و هەرێم زیاتر لە ١٢٥ هەزار رووداوی ئاگرکەوتنەوە تۆمار کراوە، بەڵام لەو رێژەیە تەنها ٢٨ هەزار حاڵەتی مەترسیدار بووە.