ئاژانسی بی بی سی رایگەیاند، بەهۆی دروستبوونی کێشەیەکی تەکنیکی جیهانییەوە، زۆرینەی گەشتە ئاسمانییەکانی ئەوروپا و ئەمریکا راگیران و کاریگەری لەسەر فریکوێنسی ژمارەیەک لە میدیا نێودەوڵەتییەکان و سیستمە بانکییەکان هەبووە.
ئەمڕۆ هەینی، ئاژانسی بی بی سی بڵاویکردەوە، کێشەیەکی تەکنیکی لە سەرانسەری جیهاندا روویداوە و کاریگەری لەسەر هێڵە ئاسمانییەکان و میدیا و بانکەکان هەبووە.
ئەوەشی خستووەتە روو، زۆرینەی گەشتەکان
لە سەرانسەری جیهاندا راگیراون و هێڵە ئاسنینەکانی وڵاتی بەریتانیاش بەهۆی هەمان
کێشەوە لەکار کەوتوون.
باسی لەوەش کردووە، بەهۆی ئەو کێشە
تەکنیکییەوە فرکوێنسی چەند میدیایەکی جیهانی وەک سکای نیوزی ئینگلیزی راوەستاوە و
پەخشی کەناڵەکەش تا ئێستا دەستی پێنەکردووە.
هاوکات لە فڕۆکەخانەکانی ئەڵمانیا،
تورکیا، ئیسپانیا و ئوسترالیا کێشە بۆ گەشتەکان دروست بووە گەشتەکان راگیراون و دەسەڵاتی
فڕۆکەوانی ئەمریکا داوای لە سەرجەم فڕۆکەکان کرد بنیشنەوە، بەهۆی کێشەکەوە و گەشتە
ئاسمانییەکان راگیران.
ئەمەش دوای ئەوە دێت، کۆمپانیای
مایکرۆسۆفت کێشەیەکی لە سیستمە جیهانییەکەیدا راگەیاند و کۆمپانیای کرۆودسترایکی ئاسایشی ئەلیکترۆنی
رووبەڕووی کێشە بووەوە لە خزمەتگوزارییەکەیدا لەسەر ئاستی جیهان.