بەگوێرەی زانیارییەکان، بەرپرسە باڵاکانی یەکێتی لەسەر وەرگرتنی سەرانە رێککەوتون و پارەکەش لەنێوان باڵەکانی ئەو حزبە دابەشدەکرێت و سەرمایەدارەکانیان دابەش کردووە، تەنانەت بە پێی رێکەوتنی نێوان باڵەکانی یەکێتی بەرتیل وەرگرتنی فەرمانگەکانیشیان دابەش کردووە بە جۆرێک کە شارەوانی سەر بە باڵێک و وەبەرهێنان سەر بە باڵێکی تر و فەرمانگەکانی تریش بە هەمان شێوە.

لەبارەی هەڵکوتانە سەر بەرپرسەکەی یەکێتیش ئێن ئاڕ تی زانیویەتی ئەو بەرپرسە پارەی لە کەسانێک وەرگرتووە کە لە دەرەوەی سنوری ئەو باڵەیە کە تێیدایە و لەدەرەوەی رێکەوتنە کۆنەکانیان بووە ئەوەش بەرپرسەکانی دیکەی یەکێتی توڕەکردووە، هەرئەوەش هۆکاربووە بۆ هەڵکوتانە سەر ماڵەکەی.

هاوکات، ئێن ئاڕتی لەگەڵ چەند سەرمایەدارێک قسەی کردووە و دەڵێن، بەرپرسانی باڵای یەکێتی و کەسی یەکەمی یەکێتی لە حکومەت و تیمەکانیان و چەندین بەرپرسی سەربازی دیکەی ناو حزبەکە سەرانە وەردەگرن و پارە لە کاسبکار و وەبەرهێنەر و بازرگانان وەردەگرن.

ئەوەی ئیستا لە سلێمانی و تەواوی هەرێمی کوردستان دەگوزەرێت، ئەوەیەی کەسانی یەکەمی دوو بنەماڵە بە ئاشکرا بازرگان و سەرمایەداران بانگ دەکەن و سەرانەیان لێ دەسەنن، لە رابردوشدا لە سلێمانی هێزی تایبەت بە فەرمانی کەسی یەکەمی یەکێتی بە نایاسایی و دور لە فەرمانی دادوەر هەڵی کوتایە سەر شوێنی نیشتەجێی خاوەنی گروپی کۆمپانیاکانی قەیوان و شاری جوان و چەندین پرۆژەی تر، وە لە ئێستادا بەشی زۆری سەرمایەدارانی سلێمانی و هەولێر هەرێمیان جێهێشتوە و لە شارەکانی ناوەڕاست و باشور سەرقاڵی کاری بازرگانین.