گووگڵ رایگەیاند، راگەیاندنی "دەستپێشخەریی دەرفەتی زیرەکی دەستکرد" لە رۆژهەڵاتی ناوەڕاست و باکووری ئەفریقا هاوتەریبە لەگەڵ پابەندبوونی خۆی بە ناوچەکە،

ئاماژەی بەوەش کرد، لە ساڵی ٢٠١٨ـەوە سێ ملیۆن کەسیان لە کارامەیی سەرەتایی دیجیتاڵی راهێناوە، هاوکات ئامانجی دەستپێشخەرییە نوێیەکە راهێنانی ٥٠٠ هەزار کەسە لە دوو ساڵی یەکەمدا بە کارامەیی پێویست.

"دەستپێشخەری دەرفەتی زیرەکی دەستکرد" لە رۆژهەڵاتی ناوەڕاست و باکووری ئەفریقا، گرنگی بە بنیادنانی کارامەیی، پشتگیریکردنی توێژینەوە، دابینکردنی بەرهەمی پەیوەندیدار و پشتگیریکردنی ژێرخانیی پێویست بۆ گەشەپێدانی تەکنەلۆژیا دەبێت.

هەروەها گووگڵ لەم چالاکییەدا رایگەیاند، بەنیازە لە نێوان ئەمساڵ تاوەکو کۆتایی ساڵی ٢٠٢٧، ١٥ ملیۆن دۆلار دابین بکات بۆ ئەوەی دڵنیابێت لەوەی هەمووان سوود لە توانای زیرەکی دەستکرد وەردەگرن.

بەگوێرەی بەیاننامەیەکی رۆژنامەوانی گووگڵ: "توێژینەوەکانی ئەم دواییە ئاماژە بە پێویستی خێراکردنی هۆشیاری لە تەکنەلۆجیای دیجیتاڵی و زیرەکی دەستکرد دەکەن بۆ یارمەتیدانی تاکی زیاتر بۆ کێبڕکێکردن لە ژینگەکانی کارکردن و ئابووریدا کە پشت بە زیرەکی دەستکرد دەبەستن".

بەپێی راپۆرتی ئیکۆنۆمیست ئیمپاکت، کاریگەری ئابووریی زیرەکی دەستکرد لە رۆژهەڵاتی ناوەڕاست و باکووری ئەفریقا تاوەکو ساڵی ٢٠٣٠ دەگاتە ٣٢٠ ملیار دۆلار.

روت پۆرات، سەرۆک و بەڕێوەبەری جێبەجێکاری وەبەرهێنان و دارایی لە کۆمپانیای ئەلفابێت و گووگڵ لە وتارێکدا لە میانی چالاکییەکەدا پشتڕاستیکردەوە، وەبەرهێنانەکانی گووگڵ لە رۆژهەڵاتی ناوەڕاست و باکووری ئەفریقا بەشدارییان کردووە لە یارمەتیدانی تاک و کۆمپانیاکان بۆ بەدەستهێنانی لێهاتوویی و توانای سوودوەرگرتن لە تەکنەلۆجیای دیجیتاڵی.