لە سەردانێکدا بۆ تورکیا، سەرۆک وەزیرانی عێراق گەیشتە ئەو وڵاتە بڕیارە لەگەڵ سەرۆکى تورکیا لەسەر چەند مەلەفێک گفتوگۆ بکات.
نوسینگەى محەمەد شیاع سودانى باسى لەوەکردووە، سەرۆک وەزیرانی عێراق و بەرپرسانی تورکیا لەسەر چەند مەلەفێکى هاوبەش گفتوگۆ دەکەن.
عێراق و تورکیا خاوەنى
چەندین مەلەفى هاوبەشن، لەسەروهەمویانەوە ئەمنى و ئابوریی و کێشەى ئاو، تائیستا چەندین
رێککەوتنى گشتگیریان واژۆکردووە، بەڵام هێشتا بەشێکى کێشەکانیان چارەسەرنەکراون.
لە ماوەی رابردووشدا سودانی ئاماژەی بەوە کرد، وڵاتەکەی لەرێگەی رێککەوتنی
هاوبەشەوە لەگەڵ تورکیادا پشکی ئاوی پێویستی دابین کردووە و بەردەوامیشن لە
گفتوگۆکانیان.
پێشتریش، بە بڕیاری سەرۆک
وەزیران، حەوت لیژنە بە مەبەستی بەدواداچوون بۆ رێککەوتنەکانی نێوان عێراق و تورکیا
پێکهێنران و سودانى داواى لە وەزارەتەکانى کشتوکاڵ
و سەرچاوەکانى ئاو و ئاوەدانکردنەوە کرد، پڕۆژە پێویستەکانى کەرتى ئاو پێشکەش
بکەن، بەتایبەت ئەو پڕۆژانەی پەیوەندیدارن بە بەنداوەکان و رووبارەکان.
ئەوەش لەکاتێکدایە،
٢٢ـی مانگی نیسانی ئەمساڵ، سەرۆک کۆماری تورکیا سەردانی عێراقی کرد و پاش
کۆبوونەوەی لەگەڵ محەمەد شیاع سودانی سەرۆک وەزیران، چەندین یاداشتنامەی
لێکتێگەیشتن لە بوارە جیاجیاکاندا لەنێوان هەردوو وڵات واژۆ کران.