PM:12:32:16/08/2024
7336 جار خوێندراوەتەوە
بەگوێرەی زانیارییەکانی پەیامنێری ئێن ئاڕ تی لە مانگی رابردووەوە نرخی بەنزین دەستی بە بەرزکردنەوە کردووە و ئەمڕۆش نرخی یەک لیتر بەنزین ٢٥ دیناری چووەتە سەر.
ئەمڕۆ هەینی پەیامنێری ئێن ئاڕ تی باسی لەوە کرد، ماوەی مانگێکە نرخی بەزین بەشێوەیەکی رێژەیی بەردەوامە لە بەرزبوونەوە و نرخی یەک لتر بەنزینی سوپەر هەزار و ٢٢٥ دینارە و یەک لیتر لە بەنزینی محەسەن هەزار و ٧٥ دینارە و نۆرماڵیش بە ٨٧٥ دینارە.
ئەوەشی خستە روو،
بەرزبوونەوەی نرخی بەنزین بە یەک جار نەبووە و چەند جارێک بەشێوەی رێژەیی نرخەکان
بەرزبوونەتەوە و ئەوەش بووەتە هۆی ناڕەزایی شۆفێران و دەڵێن حکومەتی کاربەڕێکەر هیچ
هاوکارییان ناکات و بارەکانی سەرشانیان گران دەکەن.
پەیامنێری ئێن ئاڕ تی لەبارەی بەرزبوونەوەی نرخی بەنزینەوە ئاماژەی بەوە
کرد، لە سلێمانی هیچ نرخێکی دیاریکراو و چاودێریکراو لەلایەن لایەنی بەرپرسەوە
نییە بەڵکو خاوەن بەنزینخانەکان لەرێگەی گروپی وەتسئەپەوە نرخەکان بەرزدەکەنەوە
یان کەمی دەکەنەوە.
هاوکات، لە هەولێریش بەهۆی جیاوازی نرخی بەنزین لە بەنزینخانەکان و
بەرزبوونەوەی نرخەکان لە بەشێک لە بەنزینخانەکان قەرەباڵغی دروست بووە.
