خواردنی تەندروست باشترین هەڵبژاردنە بۆ دیاریکردنی تەندروستی دڵ و کەمکردنەوەی ئاستی کۆلیسترۆڵی زیانبەخش، هەروەها پاراستنی خوێنبەرەکان.
بەگوێرەی راپۆرتێکی ماڵپەڕی "اليوم السابع" بڵاوکراوەتەوە گوێز چەندین پێکھاتەی گرنگ لەخۆ دەگرێت و دەوڵەمەندە بە ماددەی دژە ئۆکسان و سەرچاوەیەکی گرنگی چەوری ئۆمێگا سییە، کە بەهۆیەوە جەستە لە هەوکردن و گرفتە تەندروستییە جیاوازەکان دەپارێزێت.
بەگوێرەی راپۆرتەکە، گوێز چەندین تایبەتمەندی سودبەخشی هەیە، چونکە رێژەیەکی زۆری ترشی چەوری ئۆمیگا 3ی تێدایە، کە تەندروستی جەستە بەشێوەیەکی گشتی باشتر دەکات و تەندروستی دەمار و ماسولکەکان دەپارێزێت.
گوێز رێژەیەکی بەرزی مەگنیسیۆمی تێدایە کە دەمارەکان و ماسولکەکان و گەدە و کۆئەندامی هەرس دەپارێزێت، سوودێکی زۆری هەیە بۆ تەندروستی دڵ و خوێنبەرەکان.
هەروەها رێژەیەکی بەرزی ریشاڵی تەندروست لەخۆدەگرێت کە وا لە مرۆڤ دەکات بۆ ماوەیەکی زۆر هەست بە تێربوون بکات و هەست بە برسێتییەکی زۆر نەکات. هەروەها گوێز رێژەی کۆلیسترۆڵی خراپ سنووردار دەکات و رێژەی کۆلیسترۆڵی باش و بەرزدەکاتەوە.