باڵەخانەکە لە ١٠ نهۆم پێکدێت و لەسەر شەقامی فوجی دروستکراوە کە بووەتە هۆی ئەوەی گەشتیاران و دانیشتووانی ناوچەکە نەتوانن شاخەکە ببینن، ئەوەش ناڕەزایەتی زۆری هاوڵاتییانی ژاپۆنی بەدوای خۆیدا هێنا و لە سۆشیاڵ میدیاکاندا چەندین تەنز و کاریکاتێریان لەسەر دروستکرد و چەندین چالاکوان و ڤلۆگەر ڤیدیۆی تەنزئامێزیان لەسەر بڵاوکردەوە.
لەبەر ئەو هۆکارە، مانگێک پێش ئەوەی دابەش بکرێت بەسەر کڕیاراندا بڕیاری رووخاندنی دەرکرا و کۆمپانیای جێبەجێکاری پڕۆژەکە قەرەبووی کڕیاران دەکاتەوە کە نرخی هەر شوقەیەک بە ٤٤٥ تا ٦٣٦ هەزار دۆلار دەخەمڵێنرێت، کۆمپانیاکەش بێجگە لە قەرەبووکردنەوە، داواى لێبوردنیشى لە کڕیارەکان و خەڵک کرد.

شاخی فوجی بە یەکێک لە شوێنە گرنگە گەشتیارییەکانی تۆکیۆ دادەنرێت و ١٠٠ کیلۆمەتر لە باشووری رۆژئاوای تۆکیۆ دوورە، پێی دەوترێت فوجی سان و بە بەرزی سێ هەزار و ٧٧٦ مەتر بەرزترین لوتکەی وڵاتەکەیە. لەم ساڵانەی دواییدا بووەتە جێگای سەردانیکردنی گەشتیاران و رێکخراوى یونسکۆش وەک شوێنێکى مێژوویی و پڕ لە پاشماوەی دێرین ناوى هێناوە.

لە بەرامبەردا و لە هەرێمی کوردستان و بە دیاریکراوی لە شاری سلێمانی، لەلایەن کۆمپانیایەکی یەکێتیەوە شاخی گۆیژە و بەشێوەیەکی زۆر نابەرپرسانە دەڕوخێنرێت، لەپێناو دروستکردنی چەند باڵەخانەیەکی نیشتەجێبوون.

هاوکات، کاتێک چالاکوانان و رۆشنبیرانی سلێمانی هەستان بە کەمپین و دەربڕینی نارەزایەتی لەسەر رووخاندنی شاخەکە، بەشێوەیەکی توند هێرشکرایە سەریان و ئێستاش سەربارى ناڕەزایەتى زۆرى خەڵک و چالاکوانان، یەکێتى بەردەوامە لە فرۆشتن و تەختکردنى شاخەکانى دەوروبەرى سلێمانى.