سەرۆکی کۆریای باشوور بەهۆی کەمبوونەوەی ژمارەی دانیشتوان و رێژەی لەدایکبوون لە وڵاتەکەیدا باری نائاسایی دیمۆگرافی راگەیاند.
ئەمڕۆ پێنجشەممە، یون سیۆک یۆل، سەرۆکی کۆریای باشوور بەفەرمی باری نائاسایی دیمۆگرافی نیشتمانی راگەیاند و ئاماژەی بەوە کرد، هەموو رێکارێک بۆ چارەسەرکردنی کێشەی کەمبوونەوەی ژمارەی دانیشتوان و رێژەی لەدایکبوون لە وڵاتدا دەگرنە بەر.
ئاماژەی
بەوەش کرد، سێ هەنگاوی سەرەکی بۆ چارەسەرکردنی ئەو کێشەیە نراوە، لەوانە هاوسەنگی دۆخى
کارکردن و باشترکردنی چاودێریی منداڵان و دابینکردنی شوێنى نیشتەجێبوونى باشتر.
ئەوەش لەکاتێکدایە،
هەر لەمساڵدا سەرۆکی کۆریای باشوور رایگەیاند، وەزارەتێکی نوێ دروست دەکرێت بەناوی
(وەزارەتی پلاندانانی ستراتیژیی دانیشتوان) و پلەی وەزیرەکەشی وەک جێگری سەرۆک وەزیران
بۆ کاروباری کۆمەڵایەتی دەبێت بۆ رووبەڕوبوونەوەی کەمی دانیشتوان و زیادکردنی رێژەی
لەدایکبوون لەو وڵاتەدا.
کۆریای باشوور دەکەوێتە رۆژهەلاتی ئاسیا و
پایتەختەکەی شاری سیئۆلە، بەپێی دوایین خەمڵاندنەکانی نەتەوەیەکگرتووەکان، کۆی
ژمارەی دانیشتوانی کۆریای باشوور لە ناوەڕاستی ساڵی ٢٠٢٣ـدا گەیشتووەتە زیاتر لە
٥١ ملیۆن و ٧٨٤ هەزار کەس، بەراورد بە ساڵی ٢٠٢٢ ژمارەی دانیشتوان بەرێژەی ٠.٠٦٪
دابەزیوە کە تێیدا ژمارەی دانیشوان گەیشتە زیاتر لە ٥١ ملیۆن و ٨١٥ هەزار کەس.