سەردێڕ:

ئایا بەکارهێنانی ئینتەرنێت دەبێتە هۆی دڵخۆشی؟

PM:06:43:15/05/2024

1228 جار خوێندراوەتەوە

توێژینەوەیەکی گەورە کە لەسەر بنەمای راپرسییەکی جیهانی گالۆپ کە زیاتر لە دوو ملیۆن کەس لە ١٦٨ وڵاتی جیهان ئەنجامدرا، گەیشتە ئەو ئەنجامەی کە زیادبوونی دەستڕاگەیشتن بە ئینتەرنێت پەیوەندی بە باشتربوونی خۆشگوزەرانی لە سەرانسەری جیهاندا هەیە.


بەگوێرەی ماڵپەڕی نیو ساینتیست، پێدەچێت ئەم ئەنجامە پێچەوانەی ئەو ترسانە بێت بەرامبەر بە مۆبایلە زیرەکەکان کە گوایە بوونەتە هۆی کێشەی تەندروستی دەروونی و زۆر پرسیاری بێ وەڵام هێشتۆتەوە، وەک ئالوودەبوون بە سەیرکردنی شاشە و یارییە ئەلیکترۆنییەکان، هەروەها کێشەی قسەکردن و پەیوەندییە خێزانی و کۆمەڵایەتییەکان.

توێژینەوەکە لە زانکۆی کالیفۆرنیا ئەنجامدراوە و راپرسییەکەی گالۆپ پرسیاری لە خەڵک کردووە دەربارەی هەشت بواری جیاوازی ئەرێنی، لەوانە رەزامەندی لە ژیان و ئەزموونی ئەرێنی یان نەرێنی، هەروەها کۆکردنەوەی زانیاری دیمۆگرافی.

توێژەران ئەو وەڵامانەیان شیکردەوە کە لە نێوان ساڵانی ٢٠٠٦ بۆ ٢٠٢١ لە ١٦٨ وڵاتەوە بەدەستیان هێنراوە، توێژینەوەکە دەری خستووە کە زۆرینەی رەهای خەڵک ئەگەری زۆرە تووشی خۆشگوزەرانییەکی بەرزتر بن ئەگەر دەستیان بە ئینتەرنێت بگات.

ئەم پەیوەندییە ئەرێنیانە تەنانەت کاتێک مانەوە کە شیکارییەکان رێکخران بۆ ئەوەی لەبەرچاو بگیرێت کە خەڵک ئەگەری زیاتریان هەیە ئینتەرنێت بەکاربهێنن ئەگەر داهات یان ئاستی خوێندنیان زیاتر بێت.

پرسیارەکانی راپرسییەکە باسیان لە لایەنەکانی پەیوەست بە سۆشیال میدیا نەکردووە، وەک ئەوەی کە ئایا رەنگە ئاسانکاری بۆ قسەکردن بە قسەی ناشرین بکات، وێنەی جەستەی ناڕاستەقینە ئاسایی بکاتەوە، رێگە بە توندڕەوی بدات، یان ببێتە هۆی زیادەڕۆیی لە بەکارهێنانی تەکنەلۆژیا.

هەرچەندە ئەنجامەکان ئەوە ناسەلمێنن کە دەستڕاگەیشتن بە ئینتەرنێت بەختەوەری مرۆڤەکان زیاد دەکات، بەڵام پێشنیاری ئەوە دەکەن کە رەنگە یارمەتیان بدات بۆ دروستکردنی هاوڕێ، یان دەستڕاگەیشتن بە هەلی کاری زیاتر کە تەکنەلۆژیای کۆمەڵایەتی نوێن.













گەلەری